உறவுகள் தொடர்கதையா? சிறுகதையா?

எனது நண்பர் தனது இளைய மகனை 6 ஆவது படிக்கையில் தங்கள் குடும்பத்தைவிட்டு தொலைவில் இருக்கும் பள்ளிக்கு மாற்றினார். பிறகு உயர் கல்வியும் வெளியூரிலேயே கழிந்தது. தற்போது இளைய மகன் தனது கல்விக்கேற்ற வேலைக்காக முயற்சித்துக்கொண்டு சில மாதங்களாக வீட்டில் உள்ளார்.

சிறு வயதில் பதின் பருவத்தில் ஏற்பட்ட குடும்பத்தினுடனான பிரிவு மகனின் சிந்தனையில் தனித்த மாறுபாட்டை ஏற்படுத்தியிருந்தது.  தந்தைக்கு உள்ளுரில் கல்வி கற்று தனது உடனிருந்து தன்னை புரிந்து கொண்ட மூத்த மகனைப்போல் இளைய மகன் இல்லையே என்ற ஆதங்கம் இளைய மகனுக்கும் இவருக்கும் இடையே சச்சரவுகளை உண்டாக்கிக்கொண்டுள்ளது. சிறு வயதிலேயே குடும்பத்தை விட்டு மகனை பிரித்ததன் தவறை தந்தை எண்ணி எண்ணி இப்போது வேதனைப்படுகிறார்.

பதின் பருவம் என்பது குழந்தைத்தனத்தில் இருந்து விடுபட்டு ஒரு மனிதன் சுயமாக சிந்திக்கத்தொடங்கும் வயது. ஒரு தந்தை தனது மகனுக்கு அப்போது நல்ல தோழனாக இருந்து அவனை சரியான பாதையில் செலுத்த வேண்டிய காலம் அது. சரியான பாதையில் மகனை செலுத்தி அவன் செல்லத்தொடங்கிவிட்டால் பிறகு வாலிபனாகி உயர்கல்விக்கு வெளியூர் அல்லது வெளிநாடு சென்றாலும் அவன் பெரிதாக பாதை மாற வாய்ப்பு குறைவு.

இன்றைய கல்விக்கூடங்கள் மாணவர்களின் சுய சிந்தனையை சிதறடித்து அவர்களை  மதிப்பெண் எடுக்கும் இயந்திரங்களாக மாற்றிக்கொண்டிருக்கின்றன.இன்றைய மாணவர்களிடம் மனித வாழ்வின் மகத்துவங்களை போதிக்க தவறுகின்றன.

விளைவு என்ன?

லட்சங்களை மாத ஊதியமாக உற்பத்தி செய்யும் இத்தகைய இயந்திர மனிதர்கள், தங்களுடன் இணைந்து சுழல மனைவி என்ற பெயரில் மற்றொரு இயந்திரத்தை எதிர்பார்க்கிறான். மனிதனின் பொருளாதார நிலை ஆட்டம் காணும்போது அங்கு பணத்தால் நல்ல குணம், உண்மையான அன்பு போன்ற பல விஷயங்களை வாங்கிவிட முடியாது என்று உணரும்போது அவனது வாழ்வில் பிரச்சனைகளும் பிரிவினைகளும் தோன்றுகின்றன.

எந்த உறவு எந்தக்காலத்தில் பிரியும் என்பதை ஜாதகத்தை வைத்து கண்டுபிடித்துவிடலாம்.

இப்பதிவில் பெற்றோருக்கும் குழந்தைகளுக்குமான உறவு நிலைகளை மட்டும் ஜாதக ரீதியாக அலசுவோம் வாருங்கள்

ஒருவரது பெற்றோருடனான உறவு நன்றாக அமைய வேண்டுமானால் அவர் ஜாதகத்தில்

1.தாயாரை குறிக்கும் மாத்ரு காரகன் சந்திரனும் தந்தையைக் குறிக்கும் பித்ரு காரகன் சூரியனும்  ஆட்சி, உச்சம், நட்பு என்றவகையில் வலுவாக இருக்க வேண்டும்.

2.சூரியனும் சந்திரனும் பகை வீட்டிலோ அல்லது பாவிகளுடனோ 6,8,12 ஆமதிபதிகளுடனோ தொடர்பில் இருக்கக்கூடாது.

3.நீசமடைந்திருக்கக்கூடாது. அப்படி நீசமடைந்தாலும் நீசம் பங்கமடைந்திருக்க வேண்டியது அவசியம். இவ்விரு கிரகங்களும் லக்னதிற்கும் தனது வீடுகளுக்கும் 6,8,12 ல் மறைந்திருக்கக்கூடாது. சூரிய சந்திரர்களுக்கு கேந்திரத்தில் சுபாவ பாவிகளோ அல்லது லக்ன பாவிகளோ இருக்கக்கூடாது.

மேற்சொன்னபடியே தொடர்புடைய பாவங்களான நான்கும் ஒன்பதும் கீழ்குறிப்பிட்டபடி அமைவது நலம். 

1.லக்னத்திற்கு நான்கு மற்றும் ஒன்பதாம் பாவதிபதி கிரகங்கள், பாவிகள் மற்றும் 6,8,12  ஆமதிபதிகள் பார்வை சேர்க்கை இல்லாமல் அமைந்திருக்க வேண்டும். ஆட்சி, உச்சம், நட்பு என்ற வகையில் வலுவாக இருக்க வேண்டும். (ஆனால் இந்த விதி கன்னி & தனுசு லக்னத்தவர்களுக்கு பொருந்தாது. காரணம் நான்காம் வீட்டில் ஆட்சியில் இருக்கும் குரு கடுமையான கேந்திராதிபத்திய தோஷத்திற்கு ஆளாவதுதான்.மேலும் கன்னி லக்னத்துக்கு பாதகாதிபதியான குரு உச்சமடைவதும் தோஷம்தான். ஏனென்றால் குரு தாயார் வகையில் பாதகத்தை செய்ய வாய்ப்புண்டு.)

2. நான்கு ஒன்பதாம் பாவாதிபதிகள் நீசமடைந்திருக்கக்கூடாது.

3. தங்களது பாவங்களுக்கு மறைவில் அமரக்கூடாது.

4.நான்கு ஒன்பது பாவத்திற்கும் நான்கு ஒன்பது பாவாதிபதிகளுக்கும் கேந்திரத்தில் சுபாவ பாவிகளோ அல்லது லக்ன பாவிகளோ இருக்கக்கூடாது. 

இவை தவிர கிரகண தோஷம், பாவகர்தாரி தோஷம் போன்றவற்றிற்கு ஆட்படாமல் இருப்பது போன்ற பல விதிகளும் உண்டு. விதிகள் நீண்டால் பதிவில் விதிகள் மட்டுமே இருக்கும் என்பதால் இத்தோடு நிறுத்திக்கொள்வோம்.

உதாரண ஜாதகம் கீழே.

மேலே நான் குறிப்பிட்ட ஜாதகம் தான் இது.

தாயாரை குறிக்கும் மாத்ரு காரகன் சந்திரன் உச்சம். ஆனால் லக்னத்திற்கு 12 ல் மறைந்ததும் கேது சேர்க்கை பெற்றதும் தோஷம். மாத்ரு ஸ்தானாமான 4 ஆமிடத்தில் மிதுன லக்னத்திற்கு பாதகாதிபதி குரு வக்ரமடைந்த நிலையில்  அமர்ந்திருக்கிறார். மேலும் நீசமாகி வக்கிரமடைந்த மாத்ரு ஸ்தானாதிபதியும் லக்னாதிபதியுமான புதனை குரு பரிவர்த்தனை பெற்று பார்ப்பதும் மாத்ரு காரகன் சந்திரனையும் ஒன்பதாம் பார்வையில் லக்ன பாதகாதிபதியான குரு பார்ப்பதும் தாயாரின் பாக்கியத்தை அனுபவிக்க குரு தடை செய்வார் என்பதை மிகத் தெளிவாகவே ஜாதகம் உணர்த்துகிறது .ஒரு காரகனையும் அந்த காரகன் உணர்த்தும் பாவாதிபதியையும் லக்ன பாதகன் பார்த்தால் பாதகம் நிச்சயம். மேற்கண்ட ஜாதகத்தில் சந்திரன் உச்சமடைந்து நான்காமதிபதி புதன் பாதகாதிபதியான குருவுடன் பரிவர்த்தனை பெற்றதால் தாயாருக்கு இந்த ஜாதகம் பாதகத்தை செய்ய வழியில்லை. ஆனால் தாயாரின் பாக்கியங்களை பெற இயலாத சூழல் ஏற்படும். அதாவது தாயாரை விட்டு விலகி இருக்க வைக்கும். நான்காமிடம் வித்யா ஸ்தானம் என்பதால் கல்விக்காகவும் குரு பத்தாம் அதிபதி என்பதால் ஜாதகர் தனது ஜீவனத்திற்காகவும் தாயாரை விட்டு விலகியிருக்க நேரிடும் என்று நாம் அனுமானிக்கலாம்.

சூரியன் தனது கடும் பகைவனான சனியுடன் இணைந்ததும் தோஷமே. தந்தையுடனான உறவில் பகை உணர்ச்சி மேலிடும் என்பதை இது தெளிவாக்குகிறது. ஆனால் ராசிக்கு நான்கு ஒன்பது அதிபதிகள் பகைவர்களானாலும் ஜாதகருக்கு யோகத்தை வழங்கக்கூடியவர்கள். எனவே தந்தை மீது மதிப்பு இருந்தாலும் அதை வெளிப்படுத்த வாய்ப்பில்லை. மேலும் காரகன் பாவத்தில் இருப்பது தோஷம் என்ற அடிப்படையில் ராசிக்கு ஒன்பதாமிடமான பித்ரு ஸ்தானத்தில் பித்ரு காரகன் சூரியன் இருப்பதால் பிதாவுடனான உறவு பாதிப்படையும் என்பதை ஜாதகம் குறிப்[பிடுகிறது.

இத்தகைய அமைப்புகள் ஜாதகரை சிறு வயதிலேயே பெற்றோரை விட்டு பிரித்து வைத்தது.

கீழே மற்றுமொரு உதாரண ஜாதகம்.

மாத்ரு ஸ்தானம் எனப்படும் (தனுசு) லக்னத்திற்கு நான்காம் அதிபதி குரு வக்கிரமடைந்து வலு குறைந்தார். அதுமட்டுமல்ல தனது நான்காம் பாவத்திற்கு 6 ஆமிடத்தில் பாவிகளுடன் சேர்ந்து ரொம்பவே கெட்டுவிட்டார். தாயாரை குறிக்கும் மாத்ரு காரகன் சந்திரன் ஆட்சியில் இருந்தாலும் அது லக்னத்திற்கு மறைவு ஸ்தானமாகிவிட்டது.

அடுத்து தந்தையை குறிக்கும் ஒன்பதாம் பாவமான சூரியனுடைய வீடும் ராகுவால் பாதிக்கப்பட்டது. சூரியன் தனது வீட்டிற்கு 6 ல்  மகரத்தில் மறைந்துவிட்டார்.

மேற்சொன்ன அமைப்புகள் ஜாதகர் தனது பெற்றோரை விட்டு விலகி இருக்க வேண்டும் என்பதை பொதுவாக குறிக்கிறது.

ஜாதகருக்கு 2013 அக்டோபர்  14 முதல் கேது திசையில் இருக்கிறார்.

கேது தாயாரை குறிக்கும் நான்காமிடத்திற்கு 12 ஆமிடமான 3 ல் அமர்ந்ததால் தாயாரை விட்டு பிரிவு. ஒரு பாவத்திற்கு பிந்தைய பாவத்தில் இருக்கும் கிரகம் அல்லது அதன் பாவாதிபதி தன் முந்தைய பாவத்தையும் அதில் இருக்கும் கிரகத்தையும் பாதிக்கும் என்பது ஒரு முக்கிய ஜோதிட விதி.

இதனடிப்படையில் ஜாதகருக்கு நடக்கும் கேது திசை தாயாரை பாதிக்க வேண்டும். ஆனால் தாயாருக்கு வலுவான திசா புக்திகள் நடந்தாலோ அல்லது கேதுவின் எதிரி கிரகத்தின் திசா புக்திகள் நடந்தாலோ பாதிப்பு ஏற்படுத்த இயலாது. எனவே கேது தாயாரை விட்டு விலக வைப்பார் என எடுத்துக்கொள்ளலாம். 

பித்ரு ஸ்தானம் சிம்ம ராசியாகி அங்கு பாவிகளான செவ்வாயும் ராகுவும் இருப்பதும் சூரியன் தன் வீட்டுக்கு 6 ல் மறைந்ததும் ஜாதகர் தந்தையின் பாக்கியங்களையும் குறைவாகவே பெறுவார் என்பதை உணர்த்துகிறது.   

விருட்சிக ராசியில் பிறந்தவர்களுக்கு சந்திரன் நீசம். ஐப்பசி மாதம் பிறந்தவர்களுக்கு சூரியன் நீசம். இவர்கள் நிலை எப்படி என்றொரு கேள்வி எழுகிறது.

மாதா பிதா காரகர்கள் பலவீனப்பட்டாலும் இவர்கள் தொடர்புடைய பாவங்களான நான்காம் பாவம் அதன் பாவாதிபதி மற்றும் ஒன்பதாம் பாவம் அதன் பாவாதிபதி இவைகளோடு நடக்கும் திசா புக்திகளை ஆராய்ந்தே பதில் கூற வேண்டும்.

ஸ்திர ராசியான விருசிகத்திற்கு 9 ஆமதிபதி சந்திரன் பாதகாதிபதியாவதால் சந்திரன் ராசியில் நீசமாவது ஒருவகையில் நன்மையே. இதேபோல் ஐப்பசி மாதத்தில் பிறந்தவர்களுக்கு சூரியன் நீசமாவதால் சூரியன் தொடர்புடைய பாவங்கள் பலகீனமாகலாம் சூரியனின் காரகத்துவம் மட்டுமே பாதிக்கும் என்ற கட்டாயமில்லை.

எனவே கிரக காரகத்தை மட்டும் எடுத்துக்கொண்டோ அல்லது பாவத்தை மட்டுமே எடுத்துக்கொண்டோ மட்டும் ஆராயாமல் கிரகத்தை வலுவடைய செய்யும் ஜாதக காரணிகளையும் பாவத்தை தாங்கிப்பிடிக்கும் காரணிகளையும் முக்கியமாக நட்சத்திர காரணிகள் மற்றும் நவாம்ச நிலை போன்ற பல்வேறு காரணிகளையும் ஆராய்ந்தால் ஒரு உறவு அல்லது தொடர்பு எப்போது பிரியும் என்பதை தெளிவாக அறியலாம். அதன் மூலம் உறவுகளை தாங்கிப்பிடிக்கும் காரணிகளை அறிந்து அதை வலுவடைய செய்ய முயலலாம். 

மீண்டுமொரு பதிவில் சந்திப்போம்.

வாழ்த்துக்களுடன்,

அன்பன்,

பழனியப்பன்.

யாரை எங்கே வைப்பது என்று...

யாரை எங்கே வைப்பது என்று யாருக்குத் தெரிகிறதோ இல்லையோ படைத்தவனுக்கு நன்றாகவே தெரியும். சில சமயங்களில் நமது விருப்பங்களையும் வெறுப்புகளையும் மீறி வாழ்வில் சில சம்பவங்கள் நடந்துவிடுவது உண்டு. கவிஞர் கண்ணதாசன் சொன்னது போல் காரணம் புரிந்தால் கவலைகள் மறையும்.

ஒருவர் அரசியலில் ஈடுபடவும் முன்னேறவும் கீழ்க்கண்ட அமைப்பு ஜாதகத்தில் இருக்க வேண்டும்.

1.அரசியlலுக்கு காரகத்துவம் பெற்ற சுக்கிரன் வலுப்பெற்று 1௦ ஆமிடத்துனோ அல்லது சூரியனுடனோ தொடர்புகொண்டிருக்க வேண்டும்.

2. ராஜ கிரகமான சூரியன் ராசி, லக்னம், 5, 7 ஆமிடங்கள் அல்லது பத்தாமிடத்துடன் தொடர்புகொண்டிருக்க வேண்டும்.

3.அரசாங்க வகை பாக்கியங்களை குறிக்கும் 5 ஆமிடத்தில் கேது வலுத்திருக்க வேண்டும்.

4.சுதந்திர இந்திய ஜாதகத்தில் லக்னத்தில் உச்ச ராகு இருப்பதால் இந்திய அரசியலில் உள்ளவர்களும் ராகுவின் அம்சங்களாகவே இருக்க வேண்டும். இதனடிப்படையில்  அரசியலில் வெற்றி பெற சூழ்ச்சி மற்றும் சதிராட்டங்களுக்கு காரகத்துவம் பெற்ற ராகு வலுத்திருக்க வேண்டும். 

இந்தியாவின் வடகோடி மாநிலமான காஷ்மீரின் முதலமைச்சர் திருமதி.மகபூபா முக்தியின் ஜாதகம் கீழே.

ராசி அதிபதி செவ்வாயும் பாக்யாதிபதி சந்திரனும் நீச நிலையில் பரிவர்த்தனை. இதனால் வாழ்வின் முன்பகுதியில் கடும் சோதனைகளை சந்தித்து வேதனைப்பட வேண்டும். ஆனால் இத்தகைய நீச கிரக பரிவர்த்தனையானது வாழ்வின் பிற்பகுதியில் பங்கமடைந்து ராஜ யோகத்தை தர வேண்டும் என்பது விதி.  இவ்விதிப்படி முற்பகுதியில் திருமணம் நடந்து மணமுறிவு ஏற்பட்டுவிட்டது. இப்போது பிற்பகுதி வாழ்க்கை.

மேலும் ஒருவரின் தொடர்புகளை குறிக்கும் 7 ஆமிடத்தில் ராஜ்ய ஸ்தானாதிபதியும் (1௦ ஆமதிபதி))  அரச கிரகமுமான சூரியன் நின்றதும் ஜாதகி அரசாங்கத்தோடு தொடர்புகொள்ள வேண்டும் என்பதை உறுதி செய்கிறது.  7 ஆமிடமானது பத்தாமிடத்திற்கு பத்தாமிடம் (பாவத் பாவம்) என்ற வகையில் அரசியலுக்கு முக்கியத்துவம் பெறுகிறது என்பதை கவனிக்க வேண்டும்.

அரசாங்க வெகுமதிகளைக் குறிக்கு 5 ஆமிடத்தில் கேது நின்றால் ஒருவர் உயர்ந்த நிலையை தனது வாழ்வில் ஒருநாள் அடைந்துவிடுவார். அல்லது ஞானியாகவோ பிச்சைக்காரராகவோ தனது வாழ்நாளை கழிக்க வேண்டும். “வச்சா குடுமி செரச்சா மொட்டை” என்ற அனுபவ மொழி கேதுவின் 5 ஆமிட நிலைக்கு மிகச் சரியாகப் பொருந்தும். கேது விஷயத்தில் நடுவாந்திரமான நிலை, பலன் என்பதே இல்லை. மேற்கண்ட ஜாதகத்தில் ராசிக்கு 5 ல் கேது நிற்பது ஜாதகியின் அரசியல் தொடர்பை குறிக்கிறது.

குடும்ப ஸ்தானம் வக்கிர சனியால் பாதிப்படைந்ததும், குடும்ப காரகனும் குடும்ப பாவாதிபதியுமான குரு வக்கிரமடைந்து தனது குடும்ப பாவத்திற்கு 12 ஆமிடமான ராசியில் நின்றதும்,  7 ஆமிடமான களத்திர ஸ்தானத்தில் சுபாவ பாவி சூரியன் நின்றதும், சுக்கிரன்  ராசிக்கு 8 ல் மறைந்ததாலும் ஜாதகியின் மண வாழ்வை முறித்துவிட்டது.

அரசியலுக்கு காரகத்துவம் பெற்ற சுக்கிரனின் திசை ஜாத்கிக்கு தற்போது நடக்கிறது. ஒரு கிரகம் அதன் திசையில் தன் வீட்டில் உள்ள கிரகத்தையும் சார்ந்து பலன் கொடுக்க வேண்டும் என்ற விதிப்படி ரிஷபத்தில் நின்ற ராஜாங்க கிரகம் சூரியனின் பலனையும் எடுத்துக்கொண்டு தற்போது நடக்கும் சுக்கிர திசை ஜாதகிக்கு முதலமைச்சர் பதவி வழங்கியுள்ளது என்றால் அது மிகையல்ல. ஜாதகி முதலமைச்சராக பல தடைகளை சந்தித்தார் என்பது நாம் அனைவரும் அறிந்ததே. அவற்றை தகர்த்து ஜாதகியை கிரகங்கள் முதலமைச்சர் ஆக்கியுள்ளது தெளிவாகியுள்ளது.

கீழே இந்தியாவின் தென்கோடி மாநிலமான நமது தமிழகத்தின் முதலமைச்சர் மாண்புமிகு செல்வி ஜெயலலிதா அவர்களின் ஜாதகம். 

லக்னத்திற்கு பத்தாமிடத்தில் அரசியலுக்கு காரகத்துவம் பெற்ற சுக்கிரன் உச்சமானது ஜாதகியின் அரசியல் தொடர்பையும் அதே சுக்கிரன் கலைத்துறைக்கும் காரகத்துவம் பெற்றவர் என்பதால் ஜாதகியின் சினிமாத்துறை தொடர்பையும் குறிக்கிறது.

ராசியதிபதியாக சூரியனே அமைந்ததும், அந்த சூரியனும் ராசிக்கு 7ல் அமைந்ததும் ஜாதியின் அரசியல் தொடர்பை உறுதி செய்கின்றன. அரச பாக்கியங்களுக்குரிய இடமான 5 ல் கேது அமைந்து கேதுவிற்கு வீடு கொடுத்த சுக்கிரன் 1௦ ஆமிடத்தில் உச்சமடைந்ததும் ஜாதகி அரசியலில் உச்ச நிலையை அடைவார் அன்பதை அழுத்தம் திருத்தமாக குறிப்பிடுகிறது. 

ஜாதகிக்கு குரு திசை 2012  ஆம் ஆண்டே துவங்கிவிட்டது. இந்த ஜாதக அமைப்பின் படி குரு 7 மற்றும் 1௦ க்கு உரியவர் என்பதால்,முதல் எட்டு ஆண்டு கால பலனாக 1௦ ஆமிட பலன் தற்போது நடக்கிறது. ஒரு கிரகம் அதன் திசையில் தன் வீட்டில் இருக்கும் கிரகத்தையும் சார்ந்துதான் பலன் கொடுக்க வேண்டும் என்ற விதிப்படி 1௦ ஆமிடத்தில் உச்சம் பெற்ற அரசியலுக்கு காரகத்துவம் பெற்ற சுக்கிரனை சார்ந்து குரு பலன்களை தற்போது கொடுத்துக்கொண்டிருக்கிறார். எனவே ஜாதகி தற்போதும் முதலமைச்சராக தேர்ந்தெடுக்கப்பட்டிருக்கிறார். இது காலத்தின் கட்டாயம்.

உபய லக்னத்திற்கு பாதக ஸ்தானமான 7 ஆமிடத்தில் குரு ஆட்சியாக தனித்து நின்றதும், குடும்ப ஸ்தானம் வக்ர சனியால் கெட்டதும். களத்திர காரகன் சுக்கிரன் தசம கேந்திரத்தில் உச்சமாகி கேந்திராபத்திய தோஷத்திற்கு ஆளானதாலும் ஜாதகிக்கு இல்லற வாழ்க்கை பாக்கியம் வாய்க்கவில்லை என்பதை குறிப்பிடுகிறது. 

அடுத்து நாம் காண்பது இந்தியாவின் கிழக்கு பகுதி மாநிலமான மேற்கு வங்கத்தின் முதலமைச்சர் மம்தா பானர்ஜி அவர்களின் ஜாதகம்.

மேஷ லக்னத்திற்கு ராஜ்ய ஸ்தானமான 1௦ ஆமிடாதிபதியும் மக்கள் செல்வாக்கை குறிக்கும் கிரகமுமான சனி லக்னத்திற்கு 7 ல் உச்சம். இந்த உச்ச சனியின் அனுஷ நட்சத்திரத்தில் அரசியலுக்கு காரகத்துவம் பெற்ற சுக்கிரன் அமைந்தது மிக விசேஷம். உச்சனின் நட்சத்திரத்தில் அமைந்த கிரகமும் உச்ச வலுவோடு செயல்படும் என்பது கவனிக்கத்தக்கது. சுக்கிரனின் இரு வீடுகளும் சனி, சந்திரன் ஆகிய இரு உச்ச கிரகங்களை கொண்டு ஜாதகம் அமைந்ததால் சுக்கிரன் உச்ச வலுவோடு செயல்பட்டு அரசியல் தொடர்பை ஏற்படுத்தும் என்பதை கவனிக்க வேண்டும். இப்படி சுக்கிரன் 8 ல்  மறைந்தாலும் உச்ச வலுவோடு அமைந்த கிரகத்திற்கு மறைவு ஸ்தான தோஷமும் இல்லை என்பது நுட்பமான ஒரு விதி. 

சனி உச்ச வலுவோடு அமைந்துவிட்டால் அது சூரியனின் காரகத்தையும் எடுத்துக்கொண்டு செயல்படும் என்பது பெரும்பாலான ஜோதிடர்களுக்கே இன்னும் தெரிய வராத ஒரு முக்கிய விதியாகும். சூரியனும் அரசியல் செல்வாக்கை குறிக்கும் 5 ஆவது பாவத்திற்கு 5 ல் (பாவத் பாவம் என்ற அடிப்படையில்) அமைந்துள்ளார்.

ஜாதகிக்கு தற்போது உச்ச கிரகமான சனியின் திசைதான் நடப்பில் உள்ளது இதன்படி பார்த்தாலும் சூரியனுக்குரிய ராஜாங்க தொடர்பு ஜாதகிக்கு நீடிக்க வேண்டும் என்ற அமைப்பில் தற்போது மீண்டும் முதலமைச்சராக தேர்ந்தெடுக்கப்பட்டுள்ளார்.

சுகஸ்தானமான 4 ஆமிடத்தில் குரு உச்சமாகி வக்ரமாகிவிட்டார். உச்சமாகி வக்ரமான கிரகம் நீச்சத்திற்கொப்பான பலனையே தரும்.  குடும்ப காரகன் குரு நீச நிலை பெற்றுவிட்டாலும் குருவிற்கு வீடு கொடுத்த சந்திரன் உச்சமானால் அது தன வீட்டில் அமைந்த நீச தோஷம் பெற்ற குருவை வலுவடைய செய்ய வேண்டும். ஆனால் உச்சமான சந்திரன் சர ராசியான தனது கடக ராசிக்கு பாதக ஸ்தானத்தில் 11 ல் உச்சம் பெற்றதால் பயன்படவில்லை.

7 ஆமிட சனி  8 ஆமிட சுக்கிரன், நீச நிலை பெற்ற குரு ஆகியவை ஜாதகிக்கு மண வாழ்வை அமைய விடாமல் தடுத்துவிட்டன என்றால் அது மிகையல்ல.

கீழே இந்தியாவின் மேற்குக்கோடி மாநிலமான குஜராத்தின் முதலமைச்சர் ஆனந்திபென் அவர்களின் ஜாதகம். 

மகர லக்ன ஜாதகத்தில் ஐந்தாமிடாதிபதி சுக்கிரனும் 3, 12 ஆமிடாதிபதியுமான குருவுடன் பரிவர்த்தனை. 12 ஆமிடத்தில் ஒரு கிரகம் பரிவர்த்தனை பெறுகிறது என்றால் ஜாதகர் ஒன்றை இழந்து ஒன்றை அடைய வேண்டும் என்பது விதி. ஜாதகி இழந்தது குடும்ப வாழ்வை. பெற்றது அரசியல் சிறப்பு. ஐந்தாமிடம் அரச வெகுமதிகளுக்குரிய இடம் என்பதால் இது நடந்தது என்பதோடல்லாமல் லக்னாதிபதி சனி அங்கு தனது நட்பு வீட்டில் நல்லவன் ஒருவனோடு அமர்ந்துள்ளான் என்பது இங்கு முக்கியத்துவம் பெறுகிறது. இந்த வகைகளில் விசேஷ பலம் பெற்ற ஐந்தாமிடத்தை ராஜ கிரகம் சூரியன் பார்த்தது ஜாதகி அரசியலில் ஈடுபட்டு உயர்ந்த நிலையை அடைவார் என்பதை தெளிவாக குறிப்பிடுகிறது.

முதன் முறையாக இந்தியாவின் நன்கு திசைகளின் முக்கிய மாநிலங்களிலும் பெண் முதலமைச்சர்கள். நால்வருமே குடும்ப வாழ்வு அற்றவர்கள். இந்த நான்கு பேர் மட்டுமல்ல பெரும்பாலும் இந்தியாவில் ஆள்பவர்களுக்கு குடும்ப வாழ்வு இந்தியாவை  பொறுத்தவரை இல்லை என்பதே நிதர்சனம். கருணாநிதி போன்ற சிலர்  இதற்கு விதி விலக்காகலாம். ஆனால் விதி விலக்குகள் குறைவானவையே. 

இதற்கு என்ன காரணம்?

சுதந்திர இந்தியாவின் ஜாதகத்தில் இதற்கான பதில் உள்ளது. 

சுதந்திர இந்தியாவின் ஜாதகத்தில் ரிஷப லக்னத்தில் ராகு உச்சம். லக்னத்தில் உச்சம் பெற்ற ஒரு கிரகம் அதன் காரகத்துவத்தை அழுத்தம் திருத்தமாக நிலை நிறுத்தும்.  ராகுவின் அம்சங்களாக குறிப்பிடப்படுவோர்கலீல் சில கீழே.

அதீத கஷ்டங்களை கடந்து வாழ்வில் முன்னேறுபவர்கள், முஸ்லீம்கள், கண்டம் மற்றும் விபத்து போன்ற குரூர சம்பவங்களை எதிர்கொள்வோர், விதவைகள், மணமுறிவுற்றவர்கள், வாழ்க்கைத்துணையை இழந்தவர்கள், குடும்ப வாழ்வை இழந்தவர்கள் அல்லது குடும்ப வாழ்வு மறுக்கப்பட்டவர்கள் மற்றும் அனைத்து விதமான மோசமான நடத்தைகளையும் தனதாக்கிக்கொண்டவர்கள். 

இந்த அம்சங்களில் ஒன்றை பெற்ற ஒருவர்தான் இந்தியாவில் அரசியலில் வெற்றி பெறவும் நீடித்திருக்கவும் இயலும். ராகுவின் அம்சங்களை தவிர பிற அம்சங்களை பெற்றவர்கள் அரசியலுக்கு வந்து வெற்றிக்கொடி நாட்டினாலும் அது வெகு காலம் நீடிக்காது என்பதே உண்மை.

மேற்சொன்ன 4 முதல்வர்களும் இத்தகைய அம்சங்களான குடும்ப வாழ்வு அற்றவர்களும் மணமுறிவுற்றவர்களும்தான்.

இந்தியாவை சிறப்பாக ஆண்ட அன்னை இந்திரா         - ஒரு விதவை.

காங்கிரசை இயக்கிக்கொண்டிருக்கும் அன்னை சோனியா - ஒரு விதவை

தற்போதைய பிரதமர் மோடி                           – மணவாழ்வை துறந்தவர்.

மக்கள் போற்றிய முதலமைச்சர் காமராஜர்   - குடும்ப வாழ்வை துறந்தவர்.

குடும்ப வாழ்வை துறந்தவர் – வாஜ்பாய்.

தமிழ்நாடும் ஆந்திராவும் கலைகளுக்குரிய சுக்கிரனின் துலாம் ராசி என்ற அமைப்பில் வருவதால் கலைத்துறையோடு தொடர்புடையவர்களே சிறப்பான முதல்வர்கள்.  

அதீத கஷ்டத்தில், பசிகொடுமைக்கு தனது முதல் மனைவியை பறிகொடுத்தவர், கலைத்துறையில் கோலோச்சியவர்  – M.G.R

அதீத கஷ்டங்களை சந்தித்தவர்கள் – கக்கன் போன்ற எண்ணற்ற உத்தமர்கள் பல்வேறு மாநிலங்களில் முதலமைச்சர்களாக இருந்து போற்றப்பட்டிருக்கிரார்கள்.. .

M.G.R மட்டுமல்ல கருணாநிதி, ஜானகி ராமச்சந்திரன், ஜெயலலிதா, N.T .ராமராவ் ஆகியோர் முதலமைச்சர்களாக வர கலைகளுக்குரிய சுக்கிரனே முக்கிய காரணம்.

காஞ்சி மகா முனிவரின் வாக்கு:

“வாழ்வின் உயர்ந்த நிலையை அடைந்தவர்கள் அந்நிலையை அடைந்ததற்காக இழந்தவற்றை அறிந்தால் அத்தகைய நிலையை அடைய ஒருவனுக்கு மனமே வராது.”

மேற்கண்டவர்கள் ஜெயலலிதா உட்பட முதலமைச்சர்களாவது இந்த காலகட்டத்தின் கட்டாயம். இந்த காலகட்ட விதிக்கு பொருந்தாதவர்களையே காலம் தோல்வியடைய செய்துள்ளது என்பதே நிதர்னமான உண்மை.

மீண்டுமொரு பதிவில் சந்திப்போம்.

வாழ்த்துக்களுடன் அன்பன்,

பழனியப்பன். 

விருச்சிக சனி - செவ்வாய் சேர்க்கை பாதிப்புகள் என்ன?

இரு கடும் யுத்த கிரகங்களான சனியும் செவ்வாயும் தற்போது விருச்சிக ராசியில் சேர்க்கை. வழக்கமாக ஒன்றரை மாதத்தில் ஒரு ராசியை கடந்துவிடும் செவ்வாய் தன் வீட்டில் விருச்சிகத்தில் வக்கிர கதிக்கு உள்ளாவதால் சில மாதங்கள் தங்குகிறார். இதன் விளைவுகள் என்ன?. உலக அளவிலும், இந்திய அளவிலும் குறிப்பாக தேர்தலை எதிர்நோக்கியுள்ள தமிழகத்தில் இதன் பாதிப்புகள் என்ன என்பது பலரது கேள்வியாகியுள்ளது.

சனி பாதுகாப்புத்துறைக்குரிய போர்க்கிரகம். செவ்வாய் போரில் வீரர்களை வழிநடத்தும் சேனாதிபதி கிரகம். தீவிரமான செயல்திறனும் மெதுவான செயல் வேகமும் கொண்ட சனி சேனாதிபதியான செவ்வாயின் பார்வையில் அல்லது சேர்க்கையில் போரிடும்போது தீவிரமாக செயல்படும். அதனால் பாதிப்புகள் குரூரமானதாகவே இருக்கும். இதன் விளைவாக யுத்தத்திற்கு சம்மந்தமே இல்லாத சாமான்யர்களும் பாதிப்புக்கு உள்ளாவது தவிர்க்க இயலாதது.

                   

            யுத்த களத்தில் பரிதாமகரமான நிலையில் கர்ணன்.

பகை கிரகங்களான சனியும் செவ்வாயும் ஒன்று சேர்க்கையில் அங்கு கிரக யுத்தம் ஏற்படும் என்றாலும் யுத்தத்தில் ஒரு கிரகம் வக்ரகதிக்கு உள்ளானாலும் அங்கு யுத்தம் நடைபெறுவது இல்லை. இந்த அடிப்படையில் சனி இப்போது வக்ரமடைகிறது. (சனிக்கு ஐந்தாவது பாவத்தில் சூரியன் இருக்கும்போது சனி வக்ரமடையும்.) அடுத்த மாதம் சித்திரை பிறந்ததும் செவ்வாயும் வக்கிரமடைகிறது. அதனால் கிரக யுத்தம் ஏற்படாது என்றாலும் இவை இரண்டின் இணைவு வக்ரகதியிலேயே சில மாதங்கள் நீடிப்பதால் உலகிலும் இந்தியாவிலும் கடுமையான சில விளைவுகளை ஏற்படுத்தும்.

பொதுவாக சனி செவ்வாய் இணைவு பூமிக்கு இயற்கை பேரழிவுகளை கொண்டுவரும். பூகம்பம், நில நடுக்கம், விமான விபத்துகள், நாடுகளுக்கு இடையேயான போர்கள், தீவிரவாத தாக்குதல்கள், பெரும் தீ விபத்துகள் போன்றவவை ஏற்படும். கடல் உயிரினங்கள், வன உயிரினங்கள் போன்றவை பெரும் உயிரிழப்புகளை சந்திக்கும்.

தனி மனித வாழ்வில் இதன் தாக்கம் என்றால் இயற்கைக்கு மாறான செயற்கை மரணங்கள் அளப்பரிய விதத்தில் ஏற்படும். தற்கொலைகள், விபத்துகள், பகை உணர்ச்சியால் ஏற்படும் குரூர வெட்டு, குத்து, துப்பாக்கிச்சூடு மரணங்கள் அதிகரிக்கும். அரசுக்கும் மக்களுக்குமான பகை உணர்ச்சி அதிகரிக்கும் என்றாலும் தேர்தலில் அதன் தாக்கம் சிதைவடையும். (செவ்வாய் ஆட்சியில் உள்ளதால்).

சம்மந்தமற்ற வகையில்  தனி மனிதர்கள் பெரும் பாதிப்புக்கு உள்ளாவார்கள். இது தவிர்க்க இயலாதது. யுத்த களத்தில் வந்து மாட்டிக்கொள்ளும் சாமான்யர்கள் இவர்கள். நான் நேர்மையானவன் எந்த வம்புக்கும் சென்றதில்லை எனக் கூறி இந்த கிரக சூழ்நிலைகளின் பாதிப்பிலிருந்து முழுமையாக தப்பிக்க இயலாது என்றாலும் மிகுந்த எச்சரிக்கையுடன் இந்த கால கட்டத்தை கடந்தாக வேண்டிய சூழல் இப்போது சாமான்ய மனிதர்களுக்கு ஏற்படும்.  

                  

      பரந்தாமன் வழிகாட்ட பார்த்தன் கர்ணனை நோக்கி பானம் விடுதல்.

சில சாமான்யர்களுக்கு கற்ற கல்வியும் நேர்மையும் பாரம்பரியமும் இந்த கிரக யுத்த களத்தில் வித்தை பயனற்றுப்போன கர்ணனின் நிலை போல் ஆகிவிடும். அளப்பரிய கல்வியாளன், பணக்காரன்  எந்த சூழ்நிலையும் எதிர்கொள்வேன் என யாரும் சவால் விட இயலாது.  காரணம் இந்த கிரக சூழலில் கடும் பாதிப்புகளை சனியின் அம்சமான சாமான்யர்களும் அடைய வேண்டும் என்பது ஜோதிட விதி.

ராஜ கிரகமான சூரியனின் வீட்டில் ராகு - குரு இருக்க  தனது உச்ச ராசி மேஷத்தையும் தன்வீட்டிற்கு திக்பலம் பெற்ற பத்தாம் வீடான ரிஷப ராசியையும் சூரியன் கடக்க இருப்பது தவறானவர்கள் மட்டுமின்றி சாமான்யர்களும் உலக அளவில்  அரசின் கெடுபிடிகளுக்கு ஆளாவார்கள் என்பதை குறிப்பிடுகிறது. ஜீவன காரகன்  சனி பகை வீட்டில் வக்ரமனவது சிறப்பென்றாலும் உடனிருக்கும் செவ்வாயால் தொழிலாளர்கள் நிர்வாகத்தின் கட்டுப்பாடுகளால் நிம்மதி இழப்பர்.  தொழிலில் அனுசரனை இல்லாவிட்டால் பணியிழப்பும் ஏற்படும். இந்நிலை வரும் புரட்டாசி மாதம் துவங்கும் வரை நீடிக்கிறது. அதன பிறகே மக்கள் நிம்மதியடையலாம்.

  

எனவே மிகுந்த பொறுமையும் நிதானமும் உண்மையான தெய்வ பக்தியும் கொண்டு இந்த காலகட்டத்தை கடந்திட வேண்டும்.

                     ஸ்ரீகிருஷ்ணார்ப்பணம்.

விரைவில் மீண்டுமொரு பதிவில் சந்திப்போம்.

வாழ்த்துக்களுடன்,

அன்பன்,

பழனியப்பன்.