நவாம்ச சக்கரத்தின் நுட்பங்கள்.

ஒரு மனிதனின் வாழ்வின் சம்பவங்களை ஜாதகக் கட்டத்தில் உள்ள 12 பாவங்கள் அதன் அதிபதிகள் மற்றும் தொடர்புடைய காரக கிரகங்களைக் கொண்டு அறியலாம்.

ஒரு பெண்ணின் மாதவிடாய் தொடர்புடைய விபரங்களை  5 ஆமிடம் அதன் அதிபதி ஆகியவற்றைக் கொண்டு அறியலாம். பெண் இயல்பை நிர்ணயிப்பதில் காரகன் சுக்கிரனுக்கு முக்கிய பொறுப்பு உண்டு. பெண்ணின் மாதவிடாயின் ஒழுங்கை செவ்வாய் நிர்ணயிக்கிறார். செவ்வாயை மாதவிடாய் காரகன் எனலாம். அவளுடைய குழந்தை பாக்கியத்தை குரு நிர்ணயிக்கிறார்.

மேற்கண்ட மகர லக்ன ஜாதகம்  7 நிமிட இடைவெளியில் பிறந்த இரட்டைப் பெண் குழந்தைகளில் முதல் பெண்ணின் ஜாதகம். பெண்ணின் மாதவிடாய் சுழற்சியில் முக்கிய பங்கு வகிக்கும் செவ்வாய் நீசமாகி வர்கோத்தமம் பெற்றதாலும்  ஐந்தாம் பாவதிபதி சுக்கிரன் குருவின்  பார்வை பெற்றதாலும்  ஜாதகியின் மாதவிடாய் சுழற்சியில் பாதிப்பில்லை.

நவாம்சத்தில் செவ்வாய் மற்றும் சுக்கிரனும் வர்கோத்தமம்  பெற்று வலுவாகவே உள்ளனர். புதன் நவாம்சத்தில் 5 ஆம் பாவதிபதி ஆகி நீசம் பெற்றது ஜாதகி படிப்பில் கெட்டிக்காரர் என்பதைக் குறிப்பிடும் அதே நேரம் அவர் உயர் கல்வி பெறும் நிலையில் கடின சூழ்நிலைகளைக் கடந்தாக வேண்டும் என்பதையும் குறிப்பிடுகிறது. ஐந்தாமிடம் ஒருவரது நுண்ணறிவைக் குறிப்பிடுவதாகும். 9 ஆம் பாவம் உயர் கல்வியை குறிக்கும். 

இந்த இரண்டாவது ஜாதகம் 7 நிமிடத்திற்குப் பின் பிறந்த ஜாதகியின் தங்கையுடையது.

முதல் ஜாதகத்தை ஒப்பிடும்போது 2வது ஜாதகத்தில் நவாம்ச லக்னம் மட்டும் மாறியுள்ளது. உச்சமாகி வக்ரமடைந்த கிரகம் நீசத்திற்கு ஒப்பான பலனைத் தரவேண்டும் என்ற விதியின் அடிப்படையில் நவாம்சத்தில் 5 ஆமிடத்தில் உள்ள சனி கெடுபலனைத் தரவேண்டியவராகிறார். இந்த ஜாதகிக்கு மாதவிடாய் சுழற்சியில் குறைபாடு உள்ளது. கல்வியில் சுமார்தான். நுண்ணறிவு இல்லை.  இந்த இரண்டிற்கும் காரணம் நவாம்சத்தில் ஐந்தாமிடத்தில் தோஷ நிலையில் அமைத்த சனிதான். முதல் ஜாதகத்தில் நவாம்சத்தில் ஆறாமிடத்தில் அமர்ந்து கெட்ட சனி நன்மையே செய்வார். ஆனால் இரண்டாம் ஜாதகத்தில் நவாம்சத்தில்  சனி புத்திர ஸ்தானமான 5 ஆமிடத்தில் அமைந்ததால் ஜாதகிக்கு தோஷத்தை கொடுக்க வேண்டியவராகிறார்.   

இரு ஜாதகத்திலும் மாதுல காரகன் (தாய் மாமனைக் குறிப்பிடும் கிரகம்) 

புதன் நீசமானது ஜாதகிகளின்  தாய்மாமன் வாழ்வில் படும் துயரங்களைக் குறிப்பிடுகிறது. 

இந்த 3 ஆவது  ஜாதகம் ஒரு பெண்ணின் ஜாதகம்.

இப்பெண்ணின் ஜாதகத்தில்  2 ஆமதிபதியும் குடும்ப காரனுமான  குரு ராசியிலும் நவாம்சத்திலும் உச்சமானது சிறப்பு. நவாம்சத்தில் குரு உச்சமடைந்தது 2 ஆம் பாவமாக அமைந்தது அதனினும் சிறப்பு. 2 ஆம் பாவத்தில்  ராசியில்  2ல் நீசமடைந்து நவாம்சத்திலும் உச்சன் குருவுடன் கூடியதால்   புதன் தனது நீசத்திலிருந்து விடுபட்டார். நவாம்சத்திலும் மண வாழ்வைக் குறிக்கும் பாவங்களான 2,7 பாவங்கள் நல்ல நிலையிலேயே அமைந்துள்ளது. ராசியிலும் நவாம்சத்திலும் 2 ஆமிடத்தோடு தொடர்புடைய மாதுல காரகன்  புதனால் ஜாதகி தனது தாய் மாமனை மனம் புரிந்தார். புதன் வித்யா காரகனும் ஆவதால் ஜாதகி  பள்ளி ஆசிரியையாகப் பணிபுரிகிறார். ராசியில் 2லும் நவாம்சத்தில் ஜீவன ஸ்தானமான 10லும் சூரியன் சம்மந்தப்பட்டதால்   ஜாதகிக்கு அரசுப் பணி அமைந்தது.

முந்தைய பெண்மணியின் ஜாதக அமைப்புகளைக் கொண்ட ஒரு ஆணின் ஜாதகம் இந்த நான்காவது ஜாதகம். அதே ஆண்டில் பிறந்தவர்.

குடும்பம் அமைவதைக் குறிப்பிடும் 2வது பாவம் லக்னாதிபதி சனி அமர்ந்ததால் கெட்டது. 2 ஆம் அதிபதியும் குடும்ப காரகனுமான  குரு உச்சமடைந்ததால் அவர் தனது பாவத்தையும் உயர்வடையச் செய்ய வேண்டும். ஆனால் குருவுக்கு வீடு கொடுத்த 6 ஆமதிபதி சந்திரன் உச்சமடைந்ததால் குருவானவர் சந்திரனை மீறிச் செயல்பட முடியாது. எனவே குருவால் குடும்பத்தை அமைத்துத் தர  இயலவில்லை. ஆனால் காரகத்தின் அடிப்படையில் குரு ஜாதகரை செல்வந்தராக்கியுள்ளார். மேலும் 7ஆமதிபதி 6 ஆமதிபதியுடன் ஒன்று சேர்வது மனைவி குடும்பத்திற்கு வருவதைத் தடுக்கும் அமைப்பாகும்.

நவாம்சத்தில் 2 மற்றும் 7 ஆம் பாவத்திற்கு அதிபதி செவ்வாய் நீசமானது ஜாதகருக்கு குடும்பம் அமையாது என்பதை உறுதி செய்கிறது. இது சகோதரத்தாலும் ஜாதகரின் உறுதியற்ற குணத்தாலும் அவருக்கு குடும்பம் அமையாது என்பதை குறிப்பிடுகிறது. நடந்ததும் அப்படியே.

மேற்கண்ட 5 ஆவது ஜாதகம் ஒரு ஆணினுடையது.

லக்னத்திற்கு புத்திர பாவமான 5 ஆமதிபதி செவ்வாய் 8 ல் நீசமாகி ராகுவுடன் சேர்ந்து கெட்டு மறைந்துவிட்டார். ராசிக்கு புத்திர ஸ்தானமான 5 ஆமிடம் செவ்வாய் ராகுவால் கெட்டதும் புத்திர வகையில் பாதிப்பை தரக்கூடியதே.  புத்திர காரகன் குரு 3 மறைந்துவிட்டார். 3 ஆமிடம் 5 ஆம் பாவத்திற்கு பாதக ஸ்தானம் (சர பாவமான மேஷத்திற்கு பாதக ஸ்தானமான 11 பாவத்தில் கும்பத்தில் குரு அமைந்த அமைப்பு) என்பது இங்கு கவனிக்கத்தக்கது. இதனடிப்படையில் பார்த்தால் ஜாதகரின் புத்திர பாக்கியம் கேள்விக்குறியே என்று சொல்லத் தோன்றும்.

ஜாதகருக்கு 2 புதல்விகள். எப்படி?

நீசமான செவ்வாய்க்கு வீடு கொடுத்த சந்திரன் பூரட்டாதி 4 ல் குரு சாரத்தில் நின்று புனிதமடைகிறார். பொதுவாகவே ஒரு கிரகத்தின் சாரத்தில் (நட்சத்திரத்தில்) அமையும் கிரகங்கள் அதன் நட்சத்திராதிபதி கிரகத்தின் காரகத்தை வலுவுடன் காக்கும்.

இது ஒரு சூட்சுமமான முக்கிய விதி. ஜோதிடத்தில் இப்படி எண்ணற்ற விதிகள் உள்ளன. அணைத்தையும் ஒரு சேர கவனத்தில் கொள்வதுதான் ஜோதிடர்களுக்குச் சிரமமான வேலை. இதில் தேர்ந்தவரே ஜோதிட வித்தகர் ஆவார்.

மேற்கண்ட விதியினடிப்படியில் சந்திரன் செயல்பட்டு தனது பாவத்தில் நீசமான புத்திர ஸ்தானாதிபதியும்  நண்பனுமான செவ்வாயை வலுவூட்டுகிறார். அதனால் ஜாதகருக்கு புத்திரம் ஏற்பட்டது. மேலும் நவாம்சத்தில் செவ்வாய் லக்னாதிபதி குருவுடன் அவரது ஆட்சி வீட்டில் அமைந்தது புத்திர வகையில் பாக்கியக் குறைவை ஏற்படுத்தவில்லை. நவாம்சத்தில் 5 ஆமதிபதி சனி மேஷத்தில் நீசமானாலும் அங்கு உச்சமடைந்த சூரியனால் நீச பங்கமும் ஏற்பட்டுவிட்டது. 5 ஆம் பாவாதிபதி செவ்வாய் பெண் கிரகமான சந்திரனது வீட்டில் அமைந்து சந்திரனாலும் வலுவடைந்ததால் ஜாதகருக்கு இரு குழந்தைகள். இருவருமே பெண்கள்.

5 ஆம் பாவத்திற்கு 3 ஆம் பாவமான 7 ஆம் பாவம் 2 ஆவது குழந்தையைக் குறிக்கும். 7 ஆமிடத்திற்க்கு குரு  பார்வை ஏற்பட்டதால் 2 ஆவது குழந்தை பாக்கியமும் கிட்டியது. செவ்வாயுடன் ராகு ஒரு பாவத்தில் சேர்ந்தால் அங்கு இருவருமே வலுவடைவர் என்பது ஒரு நுட்பம். ஆனால் அதன் பாதிப்பை ஜாதகர் அனுபவித்துத்தான் ஆக வேண்டும். ஜாதகர் செவ்வாயின் காரகத்தின் அடிப்படையில் பூமி (நிலம்) வகையில் கடனுக்காக விரையம் செய்தார் என்பது வருந்தத்தக்க உண்மை.  ஆனால் குரு மற்றும் சந்திரனால் புத்திர பாக்கியத்திற்கு குறைவு ஏற்படவில்லை.

இந்த ஆறாவது ஜாதகமும் ஒரு ஆணினுடையது

5 ஆமிடத்தில் புதன் உச்சமானால் ஜாதகரின் முதல் மனைவிக்கு குழந்தை பாக்கியம் கிட்டாது. இரண்டாவது மனைவிக்கு குழந்தை பாக்கியம் கிட்டும் என்றொரு விதி ஜோதிடத்தில் உண்டு. ஆனால் ஜாதகருக்கு லக்னாதிபதியும் ஆறாம் அதிபதியுமான சுக்கிரன் நவாம்சத்தில் நீசம். நவாம்சத்தில் வீரிய ஸ்தானமான 3 ஆமிடத்தில் லக்னாதிபதி சூரியன் நீசமாகி அதன் அதிபதி சுக்கிரனும் நீசமானது ஜாதகரின்  வீரியமின்மையைக் குறிப்பதோடு ஜாதகருக்கு இரண்டாவது மணம் செய்யுமளவுக்கு இல்லறத்தில் நாட்டம் இராது என்பதைக் குறிக்கிறது. ஜாதகர் ஏக பத்தினி விரதன்.  கௌரவமான வாழ்வைக் கொண்டிருந்தாலும் குழந்தை பாக்கியம் கிட்டவில்லை.

மேற்கண்ட ஜாதக அமைப்புகளில் இருந்து நவாம்சத்தை அளவிடுவது எவ்வளவு முக்கியம் என்று புரிந்து கொள்ளலாம். ராசியில் மறுக்கப்பட்ட ஒரு பாக்கியம் நவாம்சத்தில் உறுதி செய்யப்பட்டால் தாமதமாகவேணும் அந்த பாக்கியம் ஜாதகருக்குக் கிடைத்துவிடும். ஆனால் நவாம்சமும் கெட்டுவிட்டால் குறிப்பிட்ட அந்த பாக்கியம் ஜாதகருக்கு மறுக்கப்பட்டுள்ளதாகத்தான் அர்த்தம் கொள்ளவேண்டும். நவாம்சம் பற்றிய இன்னும் பல நுட்பமான முறைகளை வேறொரு  சந்தர்ப்பத்தில் காண்போம்.

அடுத்த பதிவு: சைவத் துறவியும் பௌத்தத் துறவியும்.

வாழ்த்துக்களுடன்,

அன்பன்,

பழனியப்பன். 

வேண்டுகோள்:  ஆலோசணைகளுக்காகத் தொடர்பு கொள்வோர் அற்பக் காரணங்களுக்காக தொடர்பு கொள்ள வேண்டாம்  என பணிவுடன் வேண்டுகோள் விடுக்கிறேன். ஜோதிடத்தை வாழ்வில் உபயோகமான முறையில் பயன்படுத்த வேண்டும்.    

கேந்திராதிபத்திய தோஷத்தின் பின்னணியிலுள்ள அறிவியல் உண்மை

சுபக்கிரகங்களான குரு,சுக்கிரன்,வளர்பிறைச் சந்திரன் மற்றும் புதன் ஆகியவை  1,4,7,10 ஆகிய கேந்திரங்களுக்கு அதிபதிகளாக வரும்போது அவை தனது சுபாவ குணத்தைவிட்டு அசுபத்தன்மை அடைகின்றன. சுபக்கிரகங்கள் அடையும் இந்த நிலையே கேந்திராதிபத்திய தோஷம் எனப்படுகிறது. கேந்திர ஸ்தானங்கள் அவற்றின் சொந்த வீடாக அமைந்தால் ஜாதகருக்கு கேந்திராதிபத்திய தோஷத்தின் கடுமை ஒரு குறிப்பிட்ட விஷயத்தில் அதிகமாக இருக்கும். அவற்றின் திசா புக்திகளில் அதன் தாக்கத்தை நன்கு அறியலாம்.

  

சுபக்கிரகங்களில் முதன்மையான கிரகம் குரு. முழுமையான சுபக்கிரகம் என போற்றப்படுபவர். அறிவியல் ரீதியான காரணம், குரு என அழைக்கப்படும் வியாழன் கிரகத்தின் விட்டம் 2,42,000 கிலோமீட்டரை மிஞ்சும். (1300 பூமிகளை இதன் பரப்பில் வைக்கலாம்) முற்றிலும் உறைந்த கடலால் ஆன நிலமற்ற இதன் பரப்பு சூரிய ஒளியை கிரகிக்காமல் அப்படியே குளிர்ந்த தன்மையுடன் பிரதிபலிக்கும். இந்தக் குளிர்ந்த பிரதிபலிப்பு ஒளியானது சனி, செவ்வாய் போன்ற பிற கிரகங்களிருந்து வரும் கடுமையான வெப்பக் கதிர்வீச்சினையும் குளிர்வித்து மாற்றிவிடுகிறது. இதனால்தான் வியாழன் (குரு) கிரகத்தை சுபக்கிரகம் எனப் போற்றுகிறோம்.

குருதான் கேந்திராதிபத்திய தோஷத்தில் அதிக கெடுபலனைத் தரக்கூடியவர். சுக்கிரன்,சந்திரன்,புதன் ஆகியவை இதற்குப் பிறகு வரிசைக் கிரமமாக கெடுபலனைத் தருவர். 

இந்தக் தோஷத்திலும் நுட்பமான சில விதிவிலக்குகள் உண்டு. உதாரணமாக லக்ன கேந்திரத்தில் குருவுக்கு ஏற்படும் திருக்பலத்தினால் அது கெடுபலனைத் தராது. சில பாதிப்புகளைத் தந்தாலும் அது சாதாரணமானதாகவே இருக்கும். ஆனால் வர்கோத்தமம் அடைந்த சுபக்கிரகம் கேந்திராதிபத்திய தோஷத்தை உறுதியுடன் தரும். 

ராசியில் ஆட்சியிலிருக்கும் கேந்திராதிபத்திய தோஷமடைந்த சுபக்கிரகம் நவாம்சத்தில் நீசமடைந்தால் கேந்திராதிபத்திய தோஷம் பங்கப்பட்டு கெடுபலன் ஏற்படாது. கடும் வெப்பக் கதிர் வீச்சுகளை ஏற்படுத்தும்  சனி, செவ்வாய், சூரியன், ராகு, கேது போன்ற அசுபக்கிரகங்களுடன் சேர்ந்தாலும் கேந்திராதிபத்திய தோஷம் அடைந்த கிரகம் வலுவிழந்து குறிப்பிட்ட கிரகம் கெடுபலனைத் தராது அல்லது  கெடுபலனை குறைத்துத் தரும். இதுபோன்றே தீய கிரகங்கள் பார்த்தாலும் சுபக்கிரகங்களுக்கு ஏற்படும் கேந்திராதிபத்திய தோஷம் குறையும்.

இப்போது இதன் அறிவியல் பின்னணியைக் காண்போம்.

ஜாதகத்தில் லக்னம் எனப்படுவது நாம் பிறக்கும் போது சூரியன் இருக்கும் ராசி மண்டலத்தைக் குறிப்பிடுவதாகும். (இதுபோன்றே சந்திரன் ஜனன நேரத்தில் இருக்கும் ராசி மண்டலமே ஜாதகத்தில் ராசி எனப்படுகிறது) லக்னமான ராசிமண்டலத்திலிருந்து கேந்திர ஸ்தானங்கள் எனப்படும் 4,7 மற்றும் 10 ஆவது ராசிமண்டலங்கள் சூரியனின் சுழற்சி விதிகளின்படி  குளிர்ந்த தன்மையான கதிர் வீச்சினைக்  கொண்டிருக்கும். இப்படி ஏற்கனவே குளிர்ந்த தன்மையுடைய இந்த இடங்களுக்கு அதிபதிகளாக வரும் குரு, சுக்கிரன் போன்ற சுபக்கிரகங்கள் தங்களது குளிர்ந்த கதிர்வீச்சினால் அவ்விடங்களை மேலும் குளிர்வித்து உறைநிலைக்கு கொண்டுசெல்கின்றன. அதனால் அந்த ராசிமண்டலத்திலிருந்து  வரும் கதிவீச்சுக்கள் வலுவிழந்துவிடுகின்றன. அதனால் குறிப்பிட்ட அந்த பாவத்தின் பலன் ஜாதகருக்கு மறுக்கப்பட்டுவிடும் அல்லது பிரச்சினைக்குள்ளாகும். இதைத்தான் ஜோதிடத்தில் கேந்திராதிபத்திய தோஷம் என்கிறோம்.

இதனால்தான் இவ்விடங்களுக்கு வரும் சனி,செவ்வாய், ராகு, கேது போன்ற  சுபாவ பாவக் கிரகங்கள் தங்களது வெப்பக் கதிர்வீச்சை இவ்விடங்களுக்கு அளித்து இவ்விடங்கள் கொண்டிருக்கும் குளிர்ந்த கதிவீச்சால் தங்களது  சுபாவ பாவத்தன்மையிலிருந்து விடுபடுகின்றன. இத்தகைய சூழ்நிலையில் குறிப்பிட்ட பாவம் ஜாதகருக்கு நற்பலனைத் தரும். இதனால்தால் சுபாவ பாவக் கிரகங்கள் கேந்திரத்தில் அமைவது விரும்பத்தக்கது என்கிறோம். 

மேற்குறிப்பிட்ட கேந்திர பாவங்களுக்கு எதிர்மறையானது திரிகோண ஸ்தானங்கள் எனப்படும் 1,5,9 ஆம் பாவங்கள்.(லக்னம் எனப்படும் முதல் பாவம் கேந்திரம் மற்றும் திரிகோண இயல்புகள் இரண்டையுமே கொண்டிருக்கும் என்பதால் லக்னத்தை கேந்திரம் மற்றும் திரிகோணம் ஆகிய இரண்டிலும் குறிப்பிடுகிறோம்). இவ்விடங்கள் இயல்பாகவே வெப்பக் கதிர் வீச்சுக்களைக் கொண்டிருக்கும் இவ்விடங்களில் அமையும் சுபக் கிரகங்கள் தங்களது குளிர்ந்த கதிர் வீச்சை இவ்விடங்களுக்கு அளித்து அவை இயல்பாகப் பெற்றிருக்கும் வெப்பக் கதிர் வீச்சால் தங்களது சுபாவத்திலிருந்து மாறுபடுகின்றன. இதனால் அக்குறிப்பிட்ட திரிகோண பாவமும் அதில் அமைந்த சுபக் கிரகமும் ஒரு  ஜாதகருக்கு நன்மை செய்கின்றன.

எப்படி உயிரினத்தின் இயல்புக்கு அதிக குளிரற்ற அதேசமயம் அதிக வெப்பமற்ற மிதமாக தட்ப வெப்பச் சூழல் தேவையோ அதே போல்தான் ஜாதகத்தில் ஒரு பாவமும் ஒரு கிரகமும் மிதமான தட்ப வெப்பத்தைக்கொண்டிருப்பது விரும்பப்படுகிறது. மனிதன் கோவணம் கட்டி சந்நியாசியாவது விரும்பப்படாததுபோல் அதீத ஆக்ரோஷமான தூண்டுதல் உள்ளவனாக இருப்பதும் விரும்பப்படுவதில்லை. சமநிலையான மனிதனே சமுதாயத்தில் விரும்பப்படுகிறான்.  குளிர்ச்சியான சுபக்கிரகங்கள் அதீத குளிச்சியடையாமல் பாவக்கிரகங்களின் சேர்க்கை அல்லது பார்வையால் பேணப்பட வேண்டும். அதே போன்று பாவக்கிரகங்களின் கடுமையான வெப்பக் கதிர்வீச்சு   சுபக்கிரகங்களின் சேர்க்கை அல்லது பார்வையால் சமநிலையாக்கப்படவேண்டும். அப்படி அமையப்பெற்ற ஜாதகன் அதிக துன்பங்களற்ற சராசரியான இன்ப துன்பங்களுடன் கூடிய வாழ்வை அனுபவிப்பான்.

மேலே குறிப்பிட்டவை மிக நுட்பமானவை. பல ஆண்டு ஆராய்ச்சியில் பல்வேறு ஜாதகங்களை ஆராய்ந்தால் மட்டுமே இவற்றைக் கணிக்க முடியும். இவற்றை அளவிட்டதில் எனது பங்கு குறிப்பிடத் தகுந்தது என்பதை இங்கு பதிவு செய்ய விரும்புகிறேன்.

கேந்திராதிபத்திய தோஷத்தின் தீவிரம் உங்களுக்குப் புரிய வேண்டுமானால் கீழே கொடுத்துள்ள ஜாதகத்தை கவனியுங்கள்.

 

சிற்றின்பத்திற்கு காரகத்துவம் கொண்ட சுக்கிரன் உச்சம். ஆனால் என்ன பயன்? அது கேந்திர ஸ்தானமாகிவிட்டது. உபய லக்னமான மிதுன லக்னத்திற்கு பாதக ஸ்தானமான சப்தம கேந்திரத்தில் (7 ஆமிடத்தில்) குரு ஆட்சி. குருவும் சுக்கிரனும் கேந்திராதிபத்திய தோஷத்திற்கு ஆட்பட்டுவிட்டன. கிரகங்கள் எப்படி வேலை செய்யும் என்றால் அவற்றின் காரகத்துவம், அவற்றின் சொந்த பாவங்கள் மற்றும் அவை ராசிக்கட்டத்தில் அமைந்த பாவங்களின் அடிப்படையில்தான் முதலில் பலனளிக்கும். மற்ற பிற காரணிகள் பிறகுதான் பாதிக்கும். அதனடிப்படையில் குரு காரகத்தினடிப்படையில் குடும்பத்தையும் பாவத்தினடிப்படையில் களத்திர, தொழில் ஸ்தானங்களை கட்டுப்படுத்துகிறார். 

1.ஒரு கிரகம் தனது தோஷமான அமைப்பினால் ஜாதகருக்கு மிகக் கடுமை காட்டும்போது தனது காரகங்களில் ஒன்றை ஜாதகருக்கு முழுமையாக மறுத்துவிடும். பிறகு அக்கிரகம்  தொடர்புடைய பிற  விஷயங்களில் பாதிப்பைத் தராது. (அணைத்து விஷயங்களிலும் ரவுண்டு கட்டி அடித்தால் மனிதன் தாங்கமாட்டான் என கடவுள் நினைத்திருப்பாரோ என்னவோ)

2.ஒரு கிரகம் ஜாதகருக்கு ஒரு குறிப்பிட்ட விஷயத்தில்  அளப்பரிய நன்மையை செய்ய வேண்டிய சூழலில் அதன் காரகங்களில்  ஒன்றை முழுமையாக கைவிட்ட பின்னரே அளப்பரிய அந்த நன்மையை வழங்கும். 

மேற்சொன்ன  இரு விதிகளும்  குறிப்பிட்ட கிரகம் கேந்திராதிபத்திய தோஷத்தில் இல்லாமல் இருந்தாலும் செயல்படும் என்பதை நினைவில் கொள்ளவேண்டும். 

இதன் பின்னணியை ஆராய்ந்தால் மனித வாழ்வின் சம்பவங்களை ஒரு குறிப்பிட்ட  கிரகம் மட்டுமே தீர்மானிப்பதில்லை என்பது புலப்படும். 

இந்த ஜாதகத்தில் கேந்திராதிபத்திய தோஷத்திற்கு ஆளான இரு கிரகங்கள் குரு மற்றும் சுக்கிரன் ஆவர். மேற்சொன்ன விதியினடிப்படையில் பார்த்தால் குரு அதன் காரகத்தில் ஒன்றான குடும்ப வாழ்வை ஜாதகிக்கு முழுமையாக மறுத்துவிட்டார். (இதற்கு குடும்ப பாவத்தில் வக்ரகதியில் நின்ற சனியும் துணை புரிகிறார்.)  ஆனால் ராஜ்யஸ்தானமான  தனது பத்தாவது பாவத்தின் அடிப்படையில் ஜாதகிக்கு  ராஜ்ய பரிபாலனம் செய்ய வைக்கிறார். 10 ஆவது பாவத்தில் ஒரு உச்சக் கிரகம் (சுக்கிரன்) இருப்பதால் தனது 10 ஆவது பாவத்தின் பலனை மிக உயர்வாகத் தர வேண்டிய நிலையில் குரு இருக்கிறார். 

கேந்திராதிபத்திய தோஷத்தில் இருக்கும் மற்றொரு சுபக்கிரகம் சுக்கிரன். சுக்கிரனுக்கு மீனம் சொந்த வீடாக இல்லாவிட்டாலும் சுபக்கிரகம் கேந்திரத்தில் உச்சகதியில் அமைந்ததால் கேந்திராதிபத்திய தோஷத்தை தர வேண்டியவராகிறார்.  அதனால் தனது காரகங்களில் ஒன்றான இல்லற இன்பத்தை ஜாதகிக்கு முழுமையாக மறுத்துவிட்டார். ஜாதகி திரைத்துறையில் நடிப்பு, நடனம் மற்றும் பாடலிலும் பெரும் புகழ் பெற்றார். அதற்கு சுக்கிரன் ஜீவன ஸ்தானத்தில் உச்சமானதும் பிறந்த தேதி எண் 6 (24) ஆக அமைந்ததும் காரணம். அதோடு ராஜ்யஸ்தானமான 10 ஆவது பாவத்தில் உச்ச கதியில் அமர்ந்ததால் சுக்கிரன் ஜாதகிக்கு ராஜ்ய பரிபாலனம் செய்ய முழுமையாக உறுதுணை புரிகிறார். சுக்கிரன் அரசியலுக்கு உரிய கிரகம் என்பது இங்கு கவனிக்கத்தக்கது. ஆனால் இதைப் பெற ஜாதகி இழந்தது மனிதனை முழுமைப்படுத்தும் குடும்ப வாழ்வை.

ஜாதகி யார் என இன்னும் அனுமானிக்க முடியாத அப்பாவிகளுக்கு,

ஜாதகி நமது மாண்புமிகு தமிழக முதல்வர் செல்வி ஜெ.ஜெயலலிதா அவர்கள்.

அடுத்த பதிவு.

நவாம்ச சக்கரத்தின் நுட்பங்கள்.

மீண்டும் சந்திப்போம்.

வாழ்த்துக்களுடன்,

அன்பன்,

பழனியப்பன்.

தொழிலில் பங்குதாரரை தேர்ந்தெடுக்கும்போது ஜோதிட ஆலோசனை அவசியமா?

அடிக்கடி சிறிய சிறிய காரணங்களுக்காக ஜோதிடம் பார்ப்பது கூடாது.

ஆனால் குழந்தைகளின் உயர்கல்வியை முடிவு செய்யும்பொழுது, வீடு கட்டும் பொழுது, திருமணத்தை முடிவுசெய்யும் பொழுது, ஒரு தொழில் துவங்கும் பொழுது, முக்கியமாக தொழிலில் பங்குதாரரை தேர்வுசெய்யும் பொழுது ஜோதிடரின் ஆலோசனையை நாடுவது நல்லது.

வாழ்க்கைத் துணைவரைத் தேர்ந்தெடுக்கும்போது உள்ள கவனம் தொழில் கூட்டாளியைத் தேர்ந்தெடுக்கும் போதும் வேண்டும். ஏனெனில் அதன் மூலம் ஈட்டப்படும் தனமே வாழ்வின் ஆதார சக்தியாக விளங்குகிறது.

பின்வரும் ஜாதக அமைப்பை கவனியுங்கள்.

மகர லக்ன ஜாதகத்தில் தொழில் கூட்டாளியைக் குறிக்கும் 7 ஆம் அதிபதி சந்திரன் விரையஸ்தானமான 12 ஆமிடத்தில் விரையாதிபதியான தனகாரகன் குருவுடன் இணைந்து உள்ளார். இந்த அமைப்பு, ஜாதகர் வாழ்வில் நிறைய பொருளாதார இழப்புகளைச் சந்திப்பதையும் அது கூட்டாளி அல்லது மனைவி மூலமாகவே இருக்கும் என்பதனையும் குறிப்பிடுகிறது. (7 ஆமிடம் மனைவி, கூட்டாளி மற்றும் அடிக்கடி நம்மை தொடர்புகொள்பவர்களையும் குறிக்கும்) 

கீழே மற்றொரு ஜாதக அமைப்பைக் கவனியுங்கள்.

கடக லக்ன ஜாதகருக்கு விரயாதிபதி புதன் கூட்டாளி ஸ்தானமான 7 ஆமிடத்தில் உள்ளார். பங்குதாரர் மூலம் இழப்பு ஏற்படும் என்பதை இவ்வமைப்பு குறிப்பிடுகிறது. ஜீவன ஸ்தானமான 10 ஆமிடத்தில் கேதுவுடன் சேர்ந்து கெட்டுவிட்ட லக்னாதிபதி சந்திரனால் தொழிலை சிறப்பிக்க இயலவில்லை. 10 ஆமதிபதி செவ்வாய் வக்ரகதியில் சர லக்னத்திற்கு பாதக ஸ்தானமான 11 ஆமிடத்தில் சென்று அமைந்து கெட்டுவிட்டதால் அவராலும் தொழிலில் ஜாதகருக்கு சாதகமான சூழ்நிலையைத் தர இயலவில்லை. மேலும் ஜாதகரின் மேஷ ராசிக்கு தொழில் ஸ்தானமான 10 ஆமிடமான மகரத்தில் ராசிக்கு 3 & 6 ஆகிய பாவங்களுக்குரிய புதன் அமைந்துள்ளார். 6 ஆமிடாதிபதி கடன்களைக் குறிப்பவர் என்பது இங்கு கவனிக்கத்தக்கது.

இவ்விரு ஜாதகத்திலும் ராசிகள் தனுசும் மேஷமும் திரிகோண ராசிகள் என்பதும் ராசியாதிபதிகள் குரு மற்றும் செவ்வாய் இருவரும் நட்பு என்பதாலும் இரு ஜாதகர்களும் மரியாதை மிக்க நட்புணர்வோடு பழகியவர்கள். ஆனால் அந்த நட்பை மட்டுமே நம்பி தொழிலில் பங்குதாரர்களானவர்கள். இரு ஜாதகர்களுமே இறை நம்பிக்கை மிக்கவர்களாக இருந்தும் தொழிலில் ஒன்று சேர்வதற்கு முன் துரதிஷ்ட வசமாக ஜோதிட ஆலோசனை பெறத் தவறியவர்கள்.

தற்போது இவர்களின் தொழில் கூட்டணி முறிந்ததோடல்லாமல் இவர்களின் நட்பும் விதி வசத்தால் கேள்விக்குறியாகிப் போனது. காரணம் சொல்லித்தெறிய வேண்டுமா?. ஆம் தொழிலில் ஏற்பட்ட கடன்கள் மற்றும் இழப்புகளே.

எனவே இதுபோன்ற பாதிப்புகள் ஏற்பட ஜாதக ரீதியாக உள்ள வாய்ப்புகளை அது விஷயத்தில் கால்பதிக்கும் முன்னரே கண்டு முடிவெடுத்தால் நம் வாழ்வின் துயரங்களில் இருந்து நம்மை பாதுகாத்துக் கொள்ளலாம். அப்படி நமது வாழ்வின் சிரமங்களை களைய நம் முன்னோர்கள் அருளிச் சென்ற அற்புதக் கலையே ஜோதிடக் கலை.   

எனவே முக்கிய காரணங்களுக்காக கண்டிப்பாக ஜோதிடத்தின் துணையை நாடுங்கள். இறை நம்பிக்கையுடன் நமது புத்தி சாதுரியத்தையும் ஒன்று சேருங்கள் வாழ்வை வளமாக்கலாம்.

பிற்சேர்க்கை :

கடந்த 2013 ஜனவரி 23 ஆம் தேதி துவங்கப்பட்ட எனது வலைப்பூ இன்று தனது இரண்டாம் ஆண்டில் அடியெடுத்து வைக்கிறது. வலைப்பூ உலகிற்கு   புதிய அறிமுகமான எனக்கு வாசகர்களின் மன ஓட்டங்களை அறிந்துகொள்ள கடந்த ஒரு வருடம் உதவியது. தரமான, ஆர்வமும் தேடலுமுள்ள வாசகர்களைத்தான் நான் நாடுகிறேன். வேறெந்த வலைப்பூவுடனும் ஒப்பிட இயலாதவாறு எனது பாணியில் இதை நிர்வகிக்க  ஆவல். அதற்கு ஆதரவளிக்கும் அன்பு உள்ளங்களுக்கு நன்றி.

அடுத்த பதிவு "கேந்திராதிபத்திய தோஷத்தின் பின்னணியிலுள்ள அறிவியல் சூட்சுமம்."

சிந்திப்போம்.

வாழ்த்துக்களுடன்,

அன்பன்,

பழனியப்பன்.