கிரக தோஷங்களை எதிர்கொள்வது எப்படி?

ஒரு பாவத்தில் நிற்கும் கிரகம் அதன் அம்சத்தை தான் நிற்கும் அந்த பாவத்தில் ஏதேனும் ஒரு வகையில் நிலைநாட்டும்.

கிரகங்கள் தாங்கள் நிற்கும் பாவத்தின் பலனையும் எடுத்து நடத்த கடமைப்பட்டுள்ளன. எனவே ஒரு பாவத்தில் நிற்கும் கிரகம் முதன்மையாக  தனது காரக அடிப்படையிலும் பிறகு தாங்கள் நிற்கும் பாவம் எதனை குறிப்பிடுகிறதோ அதன் அடிப்படையிலும் மேலும் தாங்கள் எந்த பாவங்களுக்கு அதிபதிகளோ அந்த பாவங்கள் எதனை குறிப்பிடுகிறதோ அதன் அடிப்படையிலும் தாங்கள் நிற்கும் குறிப்பிட்ட அந்த பாவத்தில் தங்களது அம்சத்தை நிலை நாட்டும். இதில் கிரகங்கள் நிற்கும் நட்சத்திர அதிபதிகளின் பங்கு குறிப்பிட்ட கிரகங்களின் செயலுக்கு அதன் திசா புக்திகளில் தெளிவாக வெளிப்படும். 

உதாரணமாக இரண்டாம் பாவம் 1.தனம், 2.வாக்கு, 3.குடும்பம் ஆகியவற்றை முதன்மையாக குறிக்கும்.

2 ல் ராகு உள்ளதாகக்கொண்டால் ராகுவின் காரக அடிப்படையில் ஜாதகருக்கு வெளிநாட்டுத்தொடர்பு ஏற்பட்டு அதன் மூலம் சம்பாத்தியம் ஏற்பட வாய்ப்புண்டு. அப்படி ஏற்பட்டால் அதன்பிறகு வாக்கு, மற்றும் குடும்ப வகையில் ராகு பாதிப்பை தர வாய்ப்பு மிகக்குறைவே. இதற்கு ஜீவன காரகன் சனி ஜல ராசிகளுடனோ அல்லது 9, 12 ஆமதிபதிகளுடனோ தொடர்பில் இருக்க வேண்டும். இதனால் வெளிநாட்டு சம்பாத்தியம் ஏற்படும். அடுத்து வாக்கு காரகன் புதன் கெடாமல் சுபர்களுடன் இருந்தால் பொய், புரட்டு இல்லாமல் இருப்பார். அடுத்து குரு கெடாமல் இருக்க வேண்டும் ஏனெனில் குடும்ப காரகன் குரு கெட்டு குடும்ப பாவமும் ராகுவால் பாதிக்கப்பட்டால் குடும்பம் குளறுபடியாகும்.

எனவே இரண்டில் ராகு இருந்தால் இரு தாரம், பொய்யன், மதுவருந்துவான் போன்ற வகையில் மட்டும் பார்க்காமல் இரண்டாமிடம் குறிக்கும் பாவ காரகங்களை தெளிவாக அறிய அதற்குரிய கிரக காரகர்களின் நிலைமையையும் ஆராய்வது அவசியம். இதனை இங்கு குறிப்பிட மற்றொரு முக்கிய காரணம் தற்போது சில பகுதிகளில் திருமணப்பொருத்தம் பார்க்கையில் ராகு-கேது தோஷம் என்ற வகையில் நல்ல ஜாதகங்களையும் பொதுவாக ஒதுக்கி விடுகின்றனர். இது தவறு என்பதற்காகத்தான்.

லக்னத்திற்கு ஏழில் சூரியன் நின்றால் பிரிவினை ஜாதகம் என்றுகூறி பொருத்தமே பார்க்க விரும்பாத ஜோதிடர்கள் கூட உண்டு. சூரியன் ஏழில் நிற்பதால் அரசுப்பணி வரனாகப் பார்ப்பது நல்லது. ஏழாமிடத்தில் நிற்கும் சூரியன் அரசாங்கத்திற்கு  காரகத்துவம் பெற்ற கிரகம் என்பதால் இது பொருந்தும். மேலும் 7 நின்று லக்னத்தை பார்க்கும் சூரியன் ஜாதகரையும் தனது அம்சமாக அரசுப்பணி செய்பவராக அல்லது ஒரு வெற்றிகரமான தொழிலதிபராக மாற்றிவிட வாய்ப்புண்டு. அப்படி நிகழ்ந்தால் தனது காரகத்தை ஒரு வகையில் நிலை நாட்டிய சூரியன் 7 ஆமிடத்தை பாதிக்கமாட்டார் என நம்பலாம். இது ஒரு உபாயம் அவ்வளவே.  

இது போல ஏழாம் அதிபதி நீசமாகிவிட்டால் குறையுள்ள வாழ்க்கைத்துணைவரை பார்ப்பது நல்லது.

குறை என்பது உடல் ஊனம், வாழ்க்கைத்துணையை இழந்தவர், மனமுரிவுற்றவர் என்ற வகையில் இருக்கலாம். அப்படி இல்லாமல் குறையில்லா நல்ல துணையை தேர்ந்தெடுத்தால் என்ன ஆகும் என்றால் நீசமான ஏழாமதிபதி கிரகம் , வாழ்க்கைத்துணைவர் வகையில் தனது அம்சத்தை நிலைநாட்டும். அதாவது துணைவருக்கு உயிருக்கு ஆபத்தை ஏற்படுத்த வாய்ப்புண்டு. துணைவர் நீச குனங்களை பெற்றவராக இருக்கவும் வாய்ப்புண்டு. ஆனால் துணைவரின் ஜாதகம் வலுவாக இருந்தால் தனது அம்சத்தை நிலைநாட்ட முயலும் ஜாதகத்தோடு போரிட இயலாமல் மண முறிவுக்கு கொண்டு செல்லவும் வாய்ப்பு ஏற்படும் என்பதை மறுப்பதற்கில்லை.

எனக்கு நன்கு அறிந்த ஒருவரின் ஜாதகத்தில் 7 ஆமதிபதி நீச கிரகத்தோடு சேர்க்கை பெற்றுள்ளது. இவ்வமைப்பு அவரின் மனைவிக்கு மோசமானகுணத்தை ஏற்படுத்த வேண்டும். மனைவி மிக நல்லவர். ஆரோக்யமாகவும் உள்ளார். குறிப்பிடும் நபர் மோசமான நண்பர்களோடு (அரசியல்வாதிகள்) சேர்ந்து தொழில் செய்கிறார். 7 ஆமிடம் களத்திர ஸ்தானம் மட்டுமல்ல ஒருவரது தொடர்புகளையும் குறிக்கும் என்ற வகையில் அந்த நபரின் 7 ஆமிட தோஷம் மோசமான நண்பர்களோடு தொழில் ரீதியாக இணைத்து வைத்து மனைவியை பாதிக்காமல் விட்டுள்ளது.  

12 ஆமிடத்தில் பாவிகள் இருந்தால் குடும்பத்தை விட்டு பிரிந்து சென்று சம்பாதித்து வரும் கணவனை தேடுவது நல்லது. அப்படி இல்லாமல் கணவன் எப்போதும் அருகிலேயே இருந்தால் 12 ஆமிடம் குறிப்பிடும் படுக்கை அறை போர்க்களமாகத்தான் இருக்கும் என்பதில் சந்தேகமில்லை. இவ்விடத்தில் மற்றொரு விஷயம். ஒருவேளை 12 ல் பாவிகள் அமையப்பெற்ற ஜாதகர் ஒரு ஆண் எனக்கொள்வோம். அவர் இரவுப்பணி ஆற்றுபவாராக இருந்தால் அவருக்கு தூக்கம் கெடும் என்ற வகையில் தனது பாதிப்பை அங்கு நிற்கும் பாவிகள் வழங்கும். ஏனெனில் 12 ஆமிடம் தூக்கத்தையும் குறிப்பிடும்.இந்த வகை பாதிப்பு ஏற்பட்டால் அதன் பிறகு தம்பதிகளின் தாம்பத்யத்தில் கிரகங்கள் பாதிப்பை வழங்காது என எடுத்துக்கொள்ளலாம்.   

கீழே நீங்கள் காணும் வட இந்திய சூப்பர் ஸ்டார் அமிதாப்பச்சன் ஜாதகத்தில் சினிமா துறைக்கு காரகத்துவம் பெற்ற சுக்கிரன் நீசம். ஆனால் ஜாதகர்  கலைத்துறையில் முதன்மையானவர்.

இது எப்படி?

குரு உச்சமான பாவாதிபதி சந்திரனின்  ஹஸ்த நட்சத்திரத்தில் நின்றதால் சுக்கிரன்னு நீச பங்கம் பெற்றார். எனவே சினிமாத்துறையில் ஜாதகர் சாதித்தார். 7 ல் ஒரு பாவி நின்று சுக்கிரன் நீச பங்கமடைந்ததால் தனது காரகங்களில் ஒன்றான கலைத்துறையில் பாதிப்பு ஏற்படுத்த ராசிக்கு 10 ல் நின்ற குரு தடைவிதிப்பார் என்றதால் சுக்கிரன் தனது காரக பாதிப்பை வேறு வகையில் ஜாதகருக்கு வழங்கியுள்ளார். சுக்கிரன் மனைவியை குறிக்கும் கிரகம் என்பதால் தோஷம் மனைவிக்கு மாறிவிட்டது. 

ஜாதகரின் மனைவி ஜெய பச்சன் குள்ளம் என்பது அனைவரும் அறிந்ததே. அமிதாபச்சனுக்கும் ஜெயா பச்சனுக்கும்  உயர வேறுபாடு சென்டிமீட்டர் கணக்கில் அல்ல கிட்டத்தட்ட அடிக்கணக்கில் என்பது அனைவரும் அறிந்ததே. 7 ஆமதிபதி சூரியன் தொழில் ஸ்தானமான 10 ஆமதிபதி செவ்வோயோடு இணைந்ததால் ஜாதகர் தன்னுடன் நடித்த நடிகையையே வாழ்க்கைத்துணையாக ஏற்றார். 7 ஆமதிபதி சூரியன் செவ்வாயின் சித்திரை நட்சத்திரத்தில் நின்று குள்ளத்தனதிற்கு காரகம் பெற்ற  செவ்வாயுடனும் சேர்க்கை பெற்றதால் ஜாதகரின் மனைவி குள்ளம் என்ற வகையில் அமைந்தார் என அனுமானிக்கலாம்.

இறுதியாக நான் கூற வருவது என்னவென்றால் கிரக பாதிப்புகளை நாம் தடை செய்ய இயலாது. ஆனால் திசை மாற்றிவிட வாய்ப்பு உண்டு என்பதுதான்.

ஜோதிடர்கள் பொதுவாக செவ்வாய் தோஷம், நாக தோஷம், 7 ஆமிட களத்திர தோஷம் என்று ஜாதகங்களை நிராகரிக்காமல் குறிப்பிட்ட பாவம், பாவாதிபதி மற்றும் காரகன் இவர்களையும் ஆராய்ந்து பாதிப்பு எந்த அளவில், வகையில் இருக்கும் என்று அறிந்து பிறகு முடிவுசெய்து அவசியம்.

மீண்டுமொரு பதிவில் விரைவில் சிந்திப்போம்.

வாழ்த்துக்களுடன்,

அன்பன்,

பழனியப்பன்.

உறவுகள் தொடர்கதையா? சிறுகதையா?

எனது நண்பர் தனது இளைய மகனை 6 ஆவது படிக்கையில் தங்கள் குடும்பத்தைவிட்டு தொலைவில் இருக்கும் பள்ளிக்கு மாற்றினார். பிறகு உயர் கல்வியும் வெளியூரிலேயே கழிந்தது. தற்போது இளைய மகன் தனது கல்விக்கேற்ற வேலைக்காக முயற்சித்துக்கொண்டு சில மாதங்களாக வீட்டில் உள்ளார்.

சிறு வயதில் பதின் பருவத்தில் ஏற்பட்ட குடும்பத்தினுடனான பிரிவு மகனின் சிந்தனையில் தனித்த மாறுபாட்டை ஏற்படுத்தியிருந்தது.  தந்தைக்கு உள்ளுரில் கல்வி கற்று தனது உடனிருந்து தன்னை புரிந்து கொண்ட மூத்த மகனைப்போல் இளைய மகன் இல்லையே என்ற ஆதங்கம் இளைய மகனுக்கும் இவருக்கும் இடையே சச்சரவுகளை உண்டாக்கிக்கொண்டுள்ளது. சிறு வயதிலேயே குடும்பத்தை விட்டு மகனை பிரித்ததன் தவறை தந்தை எண்ணி எண்ணி இப்போது வேதனைப்படுகிறார்.

பதின் பருவம் என்பது குழந்தைத்தனத்தில் இருந்து விடுபட்டு ஒரு மனிதன் சுயமாக சிந்திக்கத்தொடங்கும் வயது. ஒரு தந்தை தனது மகனுக்கு அப்போது நல்ல தோழனாக இருந்து அவனை சரியான பாதையில் செலுத்த வேண்டிய காலம் அது. சரியான பாதையில் மகனை செலுத்தி அவன் செல்லத்தொடங்கிவிட்டால் பிறகு வாலிபனாகி உயர்கல்விக்கு வெளியூர் அல்லது வெளிநாடு சென்றாலும் அவன் பெரிதாக பாதை மாற வாய்ப்பு குறைவு.

இன்றைய கல்விக்கூடங்கள் மாணவர்களின் சுய சிந்தனையை சிதறடித்து அவர்களை  மதிப்பெண் எடுக்கும் இயந்திரங்களாக மாற்றிக்கொண்டிருக்கின்றன.இன்றைய மாணவர்களிடம் மனித வாழ்வின் மகத்துவங்களை போதிக்க தவறுகின்றன.

விளைவு என்ன?

லட்சங்களை மாத ஊதியமாக உற்பத்தி செய்யும் இத்தகைய இயந்திர மனிதர்கள், தங்களுடன் இணைந்து சுழல மனைவி என்ற பெயரில் மற்றொரு இயந்திரத்தை எதிர்பார்க்கிறான். மனிதனின் பொருளாதார நிலை ஆட்டம் காணும்போது அங்கு பணத்தால் நல்ல குணம், உண்மையான அன்பு போன்ற பல விஷயங்களை வாங்கிவிட முடியாது என்று உணரும்போது அவனது வாழ்வில் பிரச்சனைகளும் பிரிவினைகளும் தோன்றுகின்றன.

எந்த உறவு எந்தக்காலத்தில் பிரியும் என்பதை ஜாதகத்தை வைத்து கண்டுபிடித்துவிடலாம்.

இப்பதிவில் பெற்றோருக்கும் குழந்தைகளுக்குமான உறவு நிலைகளை மட்டும் ஜாதக ரீதியாக அலசுவோம் வாருங்கள்

ஒருவரது பெற்றோருடனான உறவு நன்றாக அமைய வேண்டுமானால் அவர் ஜாதகத்தில்

1.தாயாரை குறிக்கும் மாத்ரு காரகன் சந்திரனும் தந்தையைக் குறிக்கும் பித்ரு காரகன் சூரியனும்  ஆட்சி, உச்சம், நட்பு என்றவகையில் வலுவாக இருக்க வேண்டும்.

2.சூரியனும் சந்திரனும் பகை வீட்டிலோ அல்லது பாவிகளுடனோ 6,8,12 ஆமதிபதிகளுடனோ தொடர்பில் இருக்கக்கூடாது.

3.நீசமடைந்திருக்கக்கூடாது. அப்படி நீசமடைந்தாலும் நீசம் பங்கமடைந்திருக்க வேண்டியது அவசியம். இவ்விரு கிரகங்களும் லக்னதிற்கும் தனது வீடுகளுக்கும் 6,8,12 ல் மறைந்திருக்கக்கூடாது. சூரிய சந்திரர்களுக்கு கேந்திரத்தில் சுபாவ பாவிகளோ அல்லது லக்ன பாவிகளோ இருக்கக்கூடாது.

மேற்சொன்னபடியே தொடர்புடைய பாவங்களான நான்கும் ஒன்பதும் கீழ்குறிப்பிட்டபடி அமைவது நலம். 

1.லக்னத்திற்கு நான்கு மற்றும் ஒன்பதாம் பாவதிபதி கிரகங்கள், பாவிகள் மற்றும் 6,8,12  ஆமதிபதிகள் பார்வை சேர்க்கை இல்லாமல் அமைந்திருக்க வேண்டும். ஆட்சி, உச்சம், நட்பு என்ற வகையில் வலுவாக இருக்க வேண்டும். (ஆனால் இந்த விதி கன்னி & தனுசு லக்னத்தவர்களுக்கு பொருந்தாது. காரணம் நான்காம் வீட்டில் ஆட்சியில் இருக்கும் குரு கடுமையான கேந்திராதிபத்திய தோஷத்திற்கு ஆளாவதுதான்.மேலும் கன்னி லக்னத்துக்கு பாதகாதிபதியான குரு உச்சமடைவதும் தோஷம்தான். ஏனென்றால் குரு தாயார் வகையில் பாதகத்தை செய்ய வாய்ப்புண்டு.)

2. நான்கு ஒன்பதாம் பாவாதிபதிகள் நீசமடைந்திருக்கக்கூடாது.

3. தங்களது பாவங்களுக்கு மறைவில் அமரக்கூடாது.

4.நான்கு ஒன்பது பாவத்திற்கும் நான்கு ஒன்பது பாவாதிபதிகளுக்கும் கேந்திரத்தில் சுபாவ பாவிகளோ அல்லது லக்ன பாவிகளோ இருக்கக்கூடாது. 

இவை தவிர கிரகண தோஷம், பாவகர்தாரி தோஷம் போன்றவற்றிற்கு ஆட்படாமல் இருப்பது போன்ற பல விதிகளும் உண்டு. விதிகள் நீண்டால் பதிவில் விதிகள் மட்டுமே இருக்கும் என்பதால் இத்தோடு நிறுத்திக்கொள்வோம்.

உதாரண ஜாதகம் கீழே.

மேலே நான் குறிப்பிட்ட ஜாதகம் தான் இது.

தாயாரை குறிக்கும் மாத்ரு காரகன் சந்திரன் உச்சம். ஆனால் லக்னத்திற்கு 12 ல் மறைந்ததும் கேது சேர்க்கை பெற்றதும் தோஷம். மாத்ரு ஸ்தானாமான 4 ஆமிடத்தில் மிதுன லக்னத்திற்கு பாதகாதிபதி குரு வக்ரமடைந்த நிலையில்  அமர்ந்திருக்கிறார். மேலும் நீசமாகி வக்கிரமடைந்த மாத்ரு ஸ்தானாதிபதியும் லக்னாதிபதியுமான புதனை குரு பரிவர்த்தனை பெற்று பார்ப்பதும் மாத்ரு காரகன் சந்திரனையும் ஒன்பதாம் பார்வையில் லக்ன பாதகாதிபதியான குரு பார்ப்பதும் தாயாரின் பாக்கியத்தை அனுபவிக்க குரு தடை செய்வார் என்பதை மிகத் தெளிவாகவே ஜாதகம் உணர்த்துகிறது .ஒரு காரகனையும் அந்த காரகன் உணர்த்தும் பாவாதிபதியையும் லக்ன பாதகன் பார்த்தால் பாதகம் நிச்சயம். மேற்கண்ட ஜாதகத்தில் சந்திரன் உச்சமடைந்து நான்காமதிபதி புதன் பாதகாதிபதியான குருவுடன் பரிவர்த்தனை பெற்றதால் தாயாருக்கு இந்த ஜாதகம் பாதகத்தை செய்ய வழியில்லை. ஆனால் தாயாரின் பாக்கியங்களை பெற இயலாத சூழல் ஏற்படும். அதாவது தாயாரை விட்டு விலகி இருக்க வைக்கும். நான்காமிடம் வித்யா ஸ்தானம் என்பதால் கல்விக்காகவும் குரு பத்தாம் அதிபதி என்பதால் ஜாதகர் தனது ஜீவனத்திற்காகவும் தாயாரை விட்டு விலகியிருக்க நேரிடும் என்று நாம் அனுமானிக்கலாம்.

சூரியன் தனது கடும் பகைவனான சனியுடன் இணைந்ததும் தோஷமே. தந்தையுடனான உறவில் பகை உணர்ச்சி மேலிடும் என்பதை இது தெளிவாக்குகிறது. ஆனால் ராசிக்கு நான்கு ஒன்பது அதிபதிகள் பகைவர்களானாலும் ஜாதகருக்கு யோகத்தை வழங்கக்கூடியவர்கள். எனவே தந்தை மீது மதிப்பு இருந்தாலும் அதை வெளிப்படுத்த வாய்ப்பில்லை. மேலும் காரகன் பாவத்தில் இருப்பது தோஷம் என்ற அடிப்படையில் ராசிக்கு ஒன்பதாமிடமான பித்ரு ஸ்தானத்தில் பித்ரு காரகன் சூரியன் இருப்பதால் பிதாவுடனான உறவு பாதிப்படையும் என்பதை ஜாதகம் குறிப்[பிடுகிறது.

இத்தகைய அமைப்புகள் ஜாதகரை சிறு வயதிலேயே பெற்றோரை விட்டு பிரித்து வைத்தது.

கீழே மற்றுமொரு உதாரண ஜாதகம்.

மாத்ரு ஸ்தானம் எனப்படும் (தனுசு) லக்னத்திற்கு நான்காம் அதிபதி குரு வக்கிரமடைந்து வலு குறைந்தார். அதுமட்டுமல்ல தனது நான்காம் பாவத்திற்கு 6 ஆமிடத்தில் பாவிகளுடன் சேர்ந்து ரொம்பவே கெட்டுவிட்டார். தாயாரை குறிக்கும் மாத்ரு காரகன் சந்திரன் ஆட்சியில் இருந்தாலும் அது லக்னத்திற்கு மறைவு ஸ்தானமாகிவிட்டது.

அடுத்து தந்தையை குறிக்கும் ஒன்பதாம் பாவமான சூரியனுடைய வீடும் ராகுவால் பாதிக்கப்பட்டது. சூரியன் தனது வீட்டிற்கு 6 ல்  மகரத்தில் மறைந்துவிட்டார்.

மேற்சொன்ன அமைப்புகள் ஜாதகர் தனது பெற்றோரை விட்டு விலகி இருக்க வேண்டும் என்பதை பொதுவாக குறிக்கிறது.

ஜாதகருக்கு 2013 அக்டோபர்  14 முதல் கேது திசையில் இருக்கிறார்.

கேது தாயாரை குறிக்கும் நான்காமிடத்திற்கு 12 ஆமிடமான 3 ல் அமர்ந்ததால் தாயாரை விட்டு பிரிவு. ஒரு பாவத்திற்கு பிந்தைய பாவத்தில் இருக்கும் கிரகம் அல்லது அதன் பாவாதிபதி தன் முந்தைய பாவத்தையும் அதில் இருக்கும் கிரகத்தையும் பாதிக்கும் என்பது ஒரு முக்கிய ஜோதிட விதி.

இதனடிப்படையில் ஜாதகருக்கு நடக்கும் கேது திசை தாயாரை பாதிக்க வேண்டும். ஆனால் தாயாருக்கு வலுவான திசா புக்திகள் நடந்தாலோ அல்லது கேதுவின் எதிரி கிரகத்தின் திசா புக்திகள் நடந்தாலோ பாதிப்பு ஏற்படுத்த இயலாது. எனவே கேது தாயாரை விட்டு விலக வைப்பார் என எடுத்துக்கொள்ளலாம். 

பித்ரு ஸ்தானம் சிம்ம ராசியாகி அங்கு பாவிகளான செவ்வாயும் ராகுவும் இருப்பதும் சூரியன் தன் வீட்டுக்கு 6 ல் மறைந்ததும் ஜாதகர் தந்தையின் பாக்கியங்களையும் குறைவாகவே பெறுவார் என்பதை உணர்த்துகிறது.   

விருட்சிக ராசியில் பிறந்தவர்களுக்கு சந்திரன் நீசம். ஐப்பசி மாதம் பிறந்தவர்களுக்கு சூரியன் நீசம். இவர்கள் நிலை எப்படி என்றொரு கேள்வி எழுகிறது.

மாதா பிதா காரகர்கள் பலவீனப்பட்டாலும் இவர்கள் தொடர்புடைய பாவங்களான நான்காம் பாவம் அதன் பாவாதிபதி மற்றும் ஒன்பதாம் பாவம் அதன் பாவாதிபதி இவைகளோடு நடக்கும் திசா புக்திகளை ஆராய்ந்தே பதில் கூற வேண்டும்.

ஸ்திர ராசியான விருசிகத்திற்கு 9 ஆமதிபதி சந்திரன் பாதகாதிபதியாவதால் சந்திரன் ராசியில் நீசமாவது ஒருவகையில் நன்மையே. இதேபோல் ஐப்பசி மாதத்தில் பிறந்தவர்களுக்கு சூரியன் நீசமாவதால் சூரியன் தொடர்புடைய பாவங்கள் பலகீனமாகலாம் சூரியனின் காரகத்துவம் மட்டுமே பாதிக்கும் என்ற கட்டாயமில்லை.

எனவே கிரக காரகத்தை மட்டும் எடுத்துக்கொண்டோ அல்லது பாவத்தை மட்டுமே எடுத்துக்கொண்டோ மட்டும் ஆராயாமல் கிரகத்தை வலுவடைய செய்யும் ஜாதக காரணிகளையும் பாவத்தை தாங்கிப்பிடிக்கும் காரணிகளையும் முக்கியமாக நட்சத்திர காரணிகள் மற்றும் நவாம்ச நிலை போன்ற பல்வேறு காரணிகளையும் ஆராய்ந்தால் ஒரு உறவு அல்லது தொடர்பு எப்போது பிரியும் என்பதை தெளிவாக அறியலாம். அதன் மூலம் உறவுகளை தாங்கிப்பிடிக்கும் காரணிகளை அறிந்து அதை வலுவடைய செய்ய முயலலாம். 

மீண்டுமொரு பதிவில் சந்திப்போம்.

வாழ்த்துக்களுடன்,

அன்பன்,

பழனியப்பன்.

யாரை எங்கே வைப்பது என்று...

யாரை எங்கே வைப்பது என்று யாருக்குத் தெரிகிறதோ இல்லையோ படைத்தவனுக்கு நன்றாகவே தெரியும். சில சமயங்களில் நமது விருப்பங்களையும் வெறுப்புகளையும் மீறி வாழ்வில் சில சம்பவங்கள் நடந்துவிடுவது உண்டு. கவிஞர் கண்ணதாசன் சொன்னது போல் காரணம் புரிந்தால் கவலைகள் மறையும்.

ஒருவர் அரசியலில் ஈடுபடவும் முன்னேறவும் கீழ்க்கண்ட அமைப்பு ஜாதகத்தில் இருக்க வேண்டும்.

1.அரசியlலுக்கு காரகத்துவம் பெற்ற சுக்கிரன் வலுப்பெற்று 1௦ ஆமிடத்துனோ அல்லது சூரியனுடனோ தொடர்புகொண்டிருக்க வேண்டும்.

2. ராஜ கிரகமான சூரியன் ராசி, லக்னம், 5, 7 ஆமிடங்கள் அல்லது பத்தாமிடத்துடன் தொடர்புகொண்டிருக்க வேண்டும்.

3.அரசாங்க வகை பாக்கியங்களை குறிக்கும் 5 ஆமிடத்தில் கேது வலுத்திருக்க வேண்டும்.

4.சுதந்திர இந்திய ஜாதகத்தில் லக்னத்தில் உச்ச ராகு இருப்பதால் இந்திய அரசியலில் உள்ளவர்களும் ராகுவின் அம்சங்களாகவே இருக்க வேண்டும். இதனடிப்படையில்  அரசியலில் வெற்றி பெற சூழ்ச்சி மற்றும் சதிராட்டங்களுக்கு காரகத்துவம் பெற்ற ராகு வலுத்திருக்க வேண்டும். 

இந்தியாவின் வடகோடி மாநிலமான காஷ்மீரின் முதலமைச்சர் திருமதி.மகபூபா முக்தியின் ஜாதகம் கீழே.

ராசி அதிபதி செவ்வாயும் பாக்யாதிபதி சந்திரனும் நீச நிலையில் பரிவர்த்தனை. இதனால் வாழ்வின் முன்பகுதியில் கடும் சோதனைகளை சந்தித்து வேதனைப்பட வேண்டும். ஆனால் இத்தகைய நீச கிரக பரிவர்த்தனையானது வாழ்வின் பிற்பகுதியில் பங்கமடைந்து ராஜ யோகத்தை தர வேண்டும் என்பது விதி.  இவ்விதிப்படி முற்பகுதியில் திருமணம் நடந்து மணமுறிவு ஏற்பட்டுவிட்டது. இப்போது பிற்பகுதி வாழ்க்கை.

மேலும் ஒருவரின் தொடர்புகளை குறிக்கும் 7 ஆமிடத்தில் ராஜ்ய ஸ்தானாதிபதியும் (1௦ ஆமதிபதி))  அரச கிரகமுமான சூரியன் நின்றதும் ஜாதகி அரசாங்கத்தோடு தொடர்புகொள்ள வேண்டும் என்பதை உறுதி செய்கிறது.  7 ஆமிடமானது பத்தாமிடத்திற்கு பத்தாமிடம் (பாவத் பாவம்) என்ற வகையில் அரசியலுக்கு முக்கியத்துவம் பெறுகிறது என்பதை கவனிக்க வேண்டும்.

அரசாங்க வெகுமதிகளைக் குறிக்கு 5 ஆமிடத்தில் கேது நின்றால் ஒருவர் உயர்ந்த நிலையை தனது வாழ்வில் ஒருநாள் அடைந்துவிடுவார். அல்லது ஞானியாகவோ பிச்சைக்காரராகவோ தனது வாழ்நாளை கழிக்க வேண்டும். “வச்சா குடுமி செரச்சா மொட்டை” என்ற அனுபவ மொழி கேதுவின் 5 ஆமிட நிலைக்கு மிகச் சரியாகப் பொருந்தும். கேது விஷயத்தில் நடுவாந்திரமான நிலை, பலன் என்பதே இல்லை. மேற்கண்ட ஜாதகத்தில் ராசிக்கு 5 ல் கேது நிற்பது ஜாதகியின் அரசியல் தொடர்பை குறிக்கிறது.

குடும்ப ஸ்தானம் வக்கிர சனியால் பாதிப்படைந்ததும், குடும்ப காரகனும் குடும்ப பாவாதிபதியுமான குரு வக்கிரமடைந்து தனது குடும்ப பாவத்திற்கு 12 ஆமிடமான ராசியில் நின்றதும்,  7 ஆமிடமான களத்திர ஸ்தானத்தில் சுபாவ பாவி சூரியன் நின்றதும், சுக்கிரன்  ராசிக்கு 8 ல் மறைந்ததாலும் ஜாதகியின் மண வாழ்வை முறித்துவிட்டது.

அரசியலுக்கு காரகத்துவம் பெற்ற சுக்கிரனின் திசை ஜாத்கிக்கு தற்போது நடக்கிறது. ஒரு கிரகம் அதன் திசையில் தன் வீட்டில் உள்ள கிரகத்தையும் சார்ந்து பலன் கொடுக்க வேண்டும் என்ற விதிப்படி ரிஷபத்தில் நின்ற ராஜாங்க கிரகம் சூரியனின் பலனையும் எடுத்துக்கொண்டு தற்போது நடக்கும் சுக்கிர திசை ஜாதகிக்கு முதலமைச்சர் பதவி வழங்கியுள்ளது என்றால் அது மிகையல்ல. ஜாதகி முதலமைச்சராக பல தடைகளை சந்தித்தார் என்பது நாம் அனைவரும் அறிந்ததே. அவற்றை தகர்த்து ஜாதகியை கிரகங்கள் முதலமைச்சர் ஆக்கியுள்ளது தெளிவாகியுள்ளது.

கீழே இந்தியாவின் தென்கோடி மாநிலமான நமது தமிழகத்தின் முதலமைச்சர் மாண்புமிகு செல்வி ஜெயலலிதா அவர்களின் ஜாதகம். 

லக்னத்திற்கு பத்தாமிடத்தில் அரசியலுக்கு காரகத்துவம் பெற்ற சுக்கிரன் உச்சமானது ஜாதகியின் அரசியல் தொடர்பையும் அதே சுக்கிரன் கலைத்துறைக்கும் காரகத்துவம் பெற்றவர் என்பதால் ஜாதகியின் சினிமாத்துறை தொடர்பையும் குறிக்கிறது.

ராசியதிபதியாக சூரியனே அமைந்ததும், அந்த சூரியனும் ராசிக்கு 7ல் அமைந்ததும் ஜாதியின் அரசியல் தொடர்பை உறுதி செய்கின்றன. அரச பாக்கியங்களுக்குரிய இடமான 5 ல் கேது அமைந்து கேதுவிற்கு வீடு கொடுத்த சுக்கிரன் 1௦ ஆமிடத்தில் உச்சமடைந்ததும் ஜாதகி அரசியலில் உச்ச நிலையை அடைவார் அன்பதை அழுத்தம் திருத்தமாக குறிப்பிடுகிறது. 

ஜாதகிக்கு குரு திசை 2012  ஆம் ஆண்டே துவங்கிவிட்டது. இந்த ஜாதக அமைப்பின் படி குரு 7 மற்றும் 1௦ க்கு உரியவர் என்பதால்,முதல் எட்டு ஆண்டு கால பலனாக 1௦ ஆமிட பலன் தற்போது நடக்கிறது. ஒரு கிரகம் அதன் திசையில் தன் வீட்டில் இருக்கும் கிரகத்தையும் சார்ந்துதான் பலன் கொடுக்க வேண்டும் என்ற விதிப்படி 1௦ ஆமிடத்தில் உச்சம் பெற்ற அரசியலுக்கு காரகத்துவம் பெற்ற சுக்கிரனை சார்ந்து குரு பலன்களை தற்போது கொடுத்துக்கொண்டிருக்கிறார். எனவே ஜாதகி தற்போதும் முதலமைச்சராக தேர்ந்தெடுக்கப்பட்டிருக்கிறார். இது காலத்தின் கட்டாயம்.

உபய லக்னத்திற்கு பாதக ஸ்தானமான 7 ஆமிடத்தில் குரு ஆட்சியாக தனித்து நின்றதும், குடும்ப ஸ்தானம் வக்ர சனியால் கெட்டதும். களத்திர காரகன் சுக்கிரன் தசம கேந்திரத்தில் உச்சமாகி கேந்திராபத்திய தோஷத்திற்கு ஆளானதாலும் ஜாதகிக்கு இல்லற வாழ்க்கை பாக்கியம் வாய்க்கவில்லை என்பதை குறிப்பிடுகிறது. 

அடுத்து நாம் காண்பது இந்தியாவின் கிழக்கு பகுதி மாநிலமான மேற்கு வங்கத்தின் முதலமைச்சர் மம்தா பானர்ஜி அவர்களின் ஜாதகம்.

மேஷ லக்னத்திற்கு ராஜ்ய ஸ்தானமான 1௦ ஆமிடாதிபதியும் மக்கள் செல்வாக்கை குறிக்கும் கிரகமுமான சனி லக்னத்திற்கு 7 ல் உச்சம். இந்த உச்ச சனியின் அனுஷ நட்சத்திரத்தில் அரசியலுக்கு காரகத்துவம் பெற்ற சுக்கிரன் அமைந்தது மிக விசேஷம். உச்சனின் நட்சத்திரத்தில் அமைந்த கிரகமும் உச்ச வலுவோடு செயல்படும் என்பது கவனிக்கத்தக்கது. சுக்கிரனின் இரு வீடுகளும் சனி, சந்திரன் ஆகிய இரு உச்ச கிரகங்களை கொண்டு ஜாதகம் அமைந்ததால் சுக்கிரன் உச்ச வலுவோடு செயல்பட்டு அரசியல் தொடர்பை ஏற்படுத்தும் என்பதை கவனிக்க வேண்டும். இப்படி சுக்கிரன் 8 ல்  மறைந்தாலும் உச்ச வலுவோடு அமைந்த கிரகத்திற்கு மறைவு ஸ்தான தோஷமும் இல்லை என்பது நுட்பமான ஒரு விதி. 

சனி உச்ச வலுவோடு அமைந்துவிட்டால் அது சூரியனின் காரகத்தையும் எடுத்துக்கொண்டு செயல்படும் என்பது பெரும்பாலான ஜோதிடர்களுக்கே இன்னும் தெரிய வராத ஒரு முக்கிய விதியாகும். சூரியனும் அரசியல் செல்வாக்கை குறிக்கும் 5 ஆவது பாவத்திற்கு 5 ல் (பாவத் பாவம் என்ற அடிப்படையில்) அமைந்துள்ளார்.

ஜாதகிக்கு தற்போது உச்ச கிரகமான சனியின் திசைதான் நடப்பில் உள்ளது இதன்படி பார்த்தாலும் சூரியனுக்குரிய ராஜாங்க தொடர்பு ஜாதகிக்கு நீடிக்க வேண்டும் என்ற அமைப்பில் தற்போது மீண்டும் முதலமைச்சராக தேர்ந்தெடுக்கப்பட்டுள்ளார்.

சுகஸ்தானமான 4 ஆமிடத்தில் குரு உச்சமாகி வக்ரமாகிவிட்டார். உச்சமாகி வக்ரமான கிரகம் நீச்சத்திற்கொப்பான பலனையே தரும்.  குடும்ப காரகன் குரு நீச நிலை பெற்றுவிட்டாலும் குருவிற்கு வீடு கொடுத்த சந்திரன் உச்சமானால் அது தன வீட்டில் அமைந்த நீச தோஷம் பெற்ற குருவை வலுவடைய செய்ய வேண்டும். ஆனால் உச்சமான சந்திரன் சர ராசியான தனது கடக ராசிக்கு பாதக ஸ்தானத்தில் 11 ல் உச்சம் பெற்றதால் பயன்படவில்லை.

7 ஆமிட சனி  8 ஆமிட சுக்கிரன், நீச நிலை பெற்ற குரு ஆகியவை ஜாதகிக்கு மண வாழ்வை அமைய விடாமல் தடுத்துவிட்டன என்றால் அது மிகையல்ல.

கீழே இந்தியாவின் மேற்குக்கோடி மாநிலமான குஜராத்தின் முதலமைச்சர் ஆனந்திபென் அவர்களின் ஜாதகம். 

மகர லக்ன ஜாதகத்தில் ஐந்தாமிடாதிபதி சுக்கிரனும் 3, 12 ஆமிடாதிபதியுமான குருவுடன் பரிவர்த்தனை. 12 ஆமிடத்தில் ஒரு கிரகம் பரிவர்த்தனை பெறுகிறது என்றால் ஜாதகர் ஒன்றை இழந்து ஒன்றை அடைய வேண்டும் என்பது விதி. ஜாதகி இழந்தது குடும்ப வாழ்வை. பெற்றது அரசியல் சிறப்பு. ஐந்தாமிடம் அரச வெகுமதிகளுக்குரிய இடம் என்பதால் இது நடந்தது என்பதோடல்லாமல் லக்னாதிபதி சனி அங்கு தனது நட்பு வீட்டில் நல்லவன் ஒருவனோடு அமர்ந்துள்ளான் என்பது இங்கு முக்கியத்துவம் பெறுகிறது. இந்த வகைகளில் விசேஷ பலம் பெற்ற ஐந்தாமிடத்தை ராஜ கிரகம் சூரியன் பார்த்தது ஜாதகி அரசியலில் ஈடுபட்டு உயர்ந்த நிலையை அடைவார் என்பதை தெளிவாக குறிப்பிடுகிறது.

முதன் முறையாக இந்தியாவின் நன்கு திசைகளின் முக்கிய மாநிலங்களிலும் பெண் முதலமைச்சர்கள். நால்வருமே குடும்ப வாழ்வு அற்றவர்கள். இந்த நான்கு பேர் மட்டுமல்ல பெரும்பாலும் இந்தியாவில் ஆள்பவர்களுக்கு குடும்ப வாழ்வு இந்தியாவை  பொறுத்தவரை இல்லை என்பதே நிதர்சனம். கருணாநிதி போன்ற சிலர்  இதற்கு விதி விலக்காகலாம். ஆனால் விதி விலக்குகள் குறைவானவையே. 

இதற்கு என்ன காரணம்?

சுதந்திர இந்தியாவின் ஜாதகத்தில் இதற்கான பதில் உள்ளது. 

சுதந்திர இந்தியாவின் ஜாதகத்தில் ரிஷப லக்னத்தில் ராகு உச்சம். லக்னத்தில் உச்சம் பெற்ற ஒரு கிரகம் அதன் காரகத்துவத்தை அழுத்தம் திருத்தமாக நிலை நிறுத்தும்.  ராகுவின் அம்சங்களாக குறிப்பிடப்படுவோர்கலீல் சில கீழே.

அதீத கஷ்டங்களை கடந்து வாழ்வில் முன்னேறுபவர்கள், முஸ்லீம்கள், கண்டம் மற்றும் விபத்து போன்ற குரூர சம்பவங்களை எதிர்கொள்வோர், விதவைகள், மணமுறிவுற்றவர்கள், வாழ்க்கைத்துணையை இழந்தவர்கள், குடும்ப வாழ்வை இழந்தவர்கள் அல்லது குடும்ப வாழ்வு மறுக்கப்பட்டவர்கள் மற்றும் அனைத்து விதமான மோசமான நடத்தைகளையும் தனதாக்கிக்கொண்டவர்கள். 

இந்த அம்சங்களில் ஒன்றை பெற்ற ஒருவர்தான் இந்தியாவில் அரசியலில் வெற்றி பெறவும் நீடித்திருக்கவும் இயலும். ராகுவின் அம்சங்களை தவிர பிற அம்சங்களை பெற்றவர்கள் அரசியலுக்கு வந்து வெற்றிக்கொடி நாட்டினாலும் அது வெகு காலம் நீடிக்காது என்பதே உண்மை.

மேற்சொன்ன 4 முதல்வர்களும் இத்தகைய அம்சங்களான குடும்ப வாழ்வு அற்றவர்களும் மணமுறிவுற்றவர்களும்தான்.

இந்தியாவை சிறப்பாக ஆண்ட அன்னை இந்திரா         - ஒரு விதவை.

காங்கிரசை இயக்கிக்கொண்டிருக்கும் அன்னை சோனியா - ஒரு விதவை

தற்போதைய பிரதமர் மோடி                           – மணவாழ்வை துறந்தவர்.

மக்கள் போற்றிய முதலமைச்சர் காமராஜர்   - குடும்ப வாழ்வை துறந்தவர்.

குடும்ப வாழ்வை துறந்தவர் – வாஜ்பாய்.

தமிழ்நாடும் ஆந்திராவும் கலைகளுக்குரிய சுக்கிரனின் துலாம் ராசி என்ற அமைப்பில் வருவதால் கலைத்துறையோடு தொடர்புடையவர்களே சிறப்பான முதல்வர்கள்.  

அதீத கஷ்டத்தில், பசிகொடுமைக்கு தனது முதல் மனைவியை பறிகொடுத்தவர், கலைத்துறையில் கோலோச்சியவர்  – M.G.R

அதீத கஷ்டங்களை சந்தித்தவர்கள் – கக்கன் போன்ற எண்ணற்ற உத்தமர்கள் பல்வேறு மாநிலங்களில் முதலமைச்சர்களாக இருந்து போற்றப்பட்டிருக்கிரார்கள்.. .

M.G.R மட்டுமல்ல கருணாநிதி, ஜானகி ராமச்சந்திரன், ஜெயலலிதா, N.T .ராமராவ் ஆகியோர் முதலமைச்சர்களாக வர கலைகளுக்குரிய சுக்கிரனே முக்கிய காரணம்.

காஞ்சி மகா முனிவரின் வாக்கு:

“வாழ்வின் உயர்ந்த நிலையை அடைந்தவர்கள் அந்நிலையை அடைந்ததற்காக இழந்தவற்றை அறிந்தால் அத்தகைய நிலையை அடைய ஒருவனுக்கு மனமே வராது.”

மேற்கண்டவர்கள் ஜெயலலிதா உட்பட முதலமைச்சர்களாவது இந்த காலகட்டத்தின் கட்டாயம். இந்த காலகட்ட விதிக்கு பொருந்தாதவர்களையே காலம் தோல்வியடைய செய்துள்ளது என்பதே நிதர்னமான உண்மை.

மீண்டுமொரு பதிவில் சந்திப்போம்.

வாழ்த்துக்களுடன் அன்பன்,

பழனியப்பன்.